Armeniia premer-ministri Nikol Pashinian (ortada), Ázerbaijan prezidenti Ilham Áliev (oń jaqta) jáne Eýropa keńesiniń basshysy Sharl Mishel. Briýssel, 14 jeltoqsan 2021 jyl.
Briýsselde Armeniia premer-ministri Nikol Pashinian jáne Ázerbaijan prezidenti Ilham Áliev mańyzdy kelissóz júrgizdi. Kezdesýdi Eýroodaq uiymdastyrdy. Bul jóninde Eýropa keńesiniń basshysy Sharl Mishel habarlady, dep jazady Azattyq.
Úsh jaqty kezdesý tórt saǵattan astam ýaqytqa sozylyp, 15 jeltoqsanǵa qaraǵan túni aiaqtaldy. Misheldiń aitýynsha, taraptar byltyrǵy soǵystan keiin ara-tura týyndaityn qaqtyǵystardy toqtatyp, máseleni diplomatiialyq jolmen sheshý amaldaryn talqylaǵan.
2020 jyly kúzde Armeniia men Ázerbaijan Taýly Qarabaq úshin soǵysyp, sonyń saldarynan eki jaqty qosa alǵanda 6,5 myńnan astam adam qaza bolǵan. Qarasha aiynyń basynda Reseidiń araaǵaiyndyq etýimen taraptar atysty toqtatý týraly ortaq málimdemege qol qoiǵan. Kelisimge sáikes, Armeniia Ázerbaijanǵa Taýly Qarabaqtaǵy birneshe aýdandy qaitarǵan. Biraq kelisimge qaramastan shekarada jii atys bolyp, taraptar bir-birin kinálap keledi. Halyqaralyq qaýymdastyq kórshi eki eldi delimitatsiia jáne demarkatsiia protsesin jedeldetýge jáne aimaqta turaqtylyq ornatý úshin kelisimge kelýge shaqyrǵan.
Eýropa keńesiniń habarlaýynsha, Áliev pen Pashinian jaǵdaidy qalypqa keltirý maqsatynda ári qarai da eleýli qadamdar jasap, aldaǵy delimitatsiia men demarkatsiia júrgizý boiynsha kelissózge qolaily jaǵdai jasaý qajettigin rastaǵan. Misheldiń aitýynsha, Armeniia men Ázerbaijan sonymen birge eki el arasyndaǵy infraqurylymdy qalpyna keltirý protsesin bastaýǵa kelisken.
