Premer-Ministrdiń orynbasary Roman Skliar Májilis ókilderiniń depýtattyq saýalyna bergen jaýabynda brýtsellezge qarsy vaktsinaǵa qoiylatyn jańa talaptardy atady, dep habarlaidy "Ult aqparat".
Vitse-Premerdiń aitýynsha, Eýraziialyq ekonomikalyq komissiia keńesiniń sheshimi boiynsha 2021 jyldan bastap halyqaralyq GMP standarty Qazaqstandaǵy barlyq biopreparat óndirýshiler úshin mindetti bolyp tabylady.
«Aýyl sharýashylyǵy janýarlaryna veterinariialyq qaǵidalardy bekitý týraly» Aýyl sharýashylyǵy ministriniń 2015 jylǵy 29 maýsymdaǵy № 7-1/587 buiryǵynyń 1088-tarmaǵyna sáikes Qazaqstan Respýblikasynyń aýmaǵynda brýtsellezge qarsy vaktsinalaýǵa jol beriledi. Brýtsellezge qarsy vaktsina Qazaqstanda nemese Eýraziialyq ekonomikalyq odaqqa múshe memleketterde tirkelgen bolýy jáne www.oie.int saitynda jariialanǵan, Dúniejúzilik janýarlar saýlyǵy uiymy usynǵan tizimde bolýy tiis», - dep jazylǵan jaýapta.
Mal iesi ekpe salý úshin brýtsellezge qarsy vaktsinany ózi tańdai alady. Biraq ol tańdaǵan ekpe joǵaryda atalǵan talaptarǵa sai bolýy mindetti.
«Janýar iesi jergilikti atqarýshy organnyń veterinariialyq dárigerine ekpe júrgizetinin 7 kún buryn habarlaýy kerek. Sondai-aq tańdalǵan vaktsinanyń túri jáne ony qoldaný ádisi týraly málimet beredi», - delingen Roman Skliardyń jaýabynda.
Premer-Ministrdiń orynbasary óz jaýabynda AÓK Damytýdyń 2022-2026 jyldarǵa arnalǵan ulttyq jobasy sheńberinde janýarlardyń asa qaýipti aýrýlaryna qarsy kúres jónindegi strategiiaǵa halyqaralyq talaptarǵa sáikes ózgerister men tolyqtyrýlar engizý josparda bar ekenin málim etti.
