Senbi, 19 maýsym kúni Braziliiada koronavirýs juqtyryp, qaitys bolǵandar sany 500 myńnan asty. Bul týraly Reuters agenttigi habarlady. Agenttiktiń jazýynsha, vaktsinalaýdyń baiaý júrgendiginen jáne úkimettiń áleýmettik qashyqtyq ustanýdy qoldamaýynan indettiń órshýi kúsheie bermek.
Reuters agenttiginiń dereginshe, Braziliiada halyqtyń nebári 11 paiyzy ǵana Covid ekpesin alǵan. Qys ailarynyń kelýimen (Jerdiń ekvatordan tómen bóliginde maýsym, shilde, tamyz qys ailary sanalady) ahýal ýshyǵýy múmkin.
Braziliia densaýlyq saqtaý ministrliginiń senbidegi dereginshe, elde koronavirýs 17,9 million adamnan anyqtalsa, sonyń 500 myń 800-i qaitys bolǵan. Kisi óliminiń bul kórsetkishi boiynsha bul elden tek AQSh qana ozyp tur. Keiingi aptada Braziliiada ortasha eseppen kún saiyn 2000 kisi kóz jumyp otyrǵan.
Mamandar kisi ólimi deńgeii budan da artýy múmkin deidi.
"Menińshe vaktsinanyń áserin kórgenshe qaitys bolǵandar sany 700 myńǵa ne 800 myńǵa jetýi yqtimal" dedi Braziliia densaýlyqty qadaǵalaý ulttyq agenttiginiń (Anvisa) burynǵy basshysy Gonzalo Vesina.
Vesina eldiń ásire ońshyl prezidenti Jair Bolsonarýdy pandemiiamen kúrese bilmedi dep aiyptaidy. Braziliia basshysy virýstyń qaýpi ásirelengen dep, indetpen kúres jónindegi sharalarǵa jáne Covid ekpelerine senimsizdikpen qaraǵan.
Eldegi Fiocruz biomeditsinalyq ortalyqtyń zertteýshisi Rafael Gimaraes Braziliiada ekpe naýqany baiaý júrip jatqanyn, sol sebepti onyń áseri tek qyrkúiekke deiin sezilmeitinin aitady. Onyń sózinshe, jaǵdai osylai jalǵasa berse kúnine 3 myń adam kóz jumǵan naýryz-sáýirdegi ahýalǵa oralýǵa bolady.
Osy aptada Braziliiada koronavirýspen kúnine 70 myń adam tirkelip otyrdy.
Latyn Amerikanyń halqy eń kóp elinde koronavirýs osy aptada kúnine 70 myń adam anyqtalyp otyrdy.
Senbi kúni el boiynsha myńdaǵan adam kóshege shyǵyp, Bolsonarýdyń indetke qarsy saiasatyna narazylyq bildirdi.
"Ol vaktsinany satyp alýǵa kóp ýaqyt shyǵyndady" dedi Rio-de-Janeirodaǵy sherýshilerdiń biri Deniz Azevedo Reuters agenttigine. "Ujymdyq immýnitet kóp úmit artýdyń qajeti joq. Sizge qajet immýnitetti tek vaktsina ǵana bere alady. Aldyn ala emdeý degen nárse joq".
