Brakonerler shabýylynan aman qalǵan Ohotzooprom inspektory Samat Ospanov alǵash ret tilshilerge suqbat berdi. Ol qazir Aqmola oblystyq kópbeiindi aýrýhanasynda emdelip jatyr.
Juma kúni Kókshetaýǵa ekologiia ministri Maǵzum Myrzaǵaliev arnaiy ushyp kelip, qoryqshyny II dárejeli "Aibyn" ordenimen marapattady.
Er adam tilshilerge bergen suqbatynda qaza tapqan áriptesi Qanysh Nurtazinovty eske aldy, dep habarlaidy Sputnik Qazaqstan.
Dárigerler naýqastyń jaǵdaiyn qanaǵattandyrarlyq degenimen, psihologiialyq densaýlyǵyna alańdap otyr.
"Samat áriptesiniń qazasyn aýyr kúizelispen qabyldady. Sondyqtan áieliniń qasynda bolyp, kútim jasaýyna ruqsat ettik", - dep túsindirdi bas dárigerdiń hirýrgiia boiynsha orynbasary Dmitrii Chaikov.
Onyń aitýynsha, Samattyń beti beri qarap keledi, jospar boiynsha em qabyldap jatyr.
"Kelesi aptada sársenbi nemese beisenbi kúni aýrýhanadan shyǵarsaq dep otyrmyz", - deidi Chaikov.
Buǵan deiin Samat Ospanov tilshilermen sóilesýden úzildi-kesildi bas tartqan bolatyn. Áieliniń aitýynsha, qoryqshy áriptesi Qanysh Nurtazinovtyń qazasyna qatty qaiǵyrǵan eken.
"Bir-birimizdi burynnan bilmesek te, birden dostasyp kettik. Bir apta buryn ǵana tanystyq. 17 shildede ol da men siiaqty issaparmen keldi. Jiyrma kún birge jumys isteýimiz kerek bolatyn. Bizdi ortaq maqsatymyz – barkonerlikke jol bermeý, sirek kezdesetin janýarlardy qorǵaý biriktirdi. Ózi sondai jaidary, meirimdi edi, biraq sózi men isine myǵym ekenin de baiqadym. Meni "qurdas" dep jaqyn tartatyn", - deidi Samat.
Marqum qoryqshynyń artynda áieli men bala-shaǵasy, qart anasy qaldy.
"Qazir olardyń qandai kúide ekenin elestetý qiyn. Imandy bolsyn, jarqyn beinesi jadymda qaldy. Áieline kúsh-qýat, sabyr bersin", - dep kóńilin bildirdi Ospanov.
Marqumnyń áieli qandai kúide ekenin Samattyń jary jaqsy túsinedi. Sol qaraly kúni Qaraǵandyda ata-anasynyń úiinde bolypty.
"Samattyń aman qalǵany úshin Jaratqanǵa myń alǵys, kúieýimniń áriptesiniń týystaryna kúsh-qýat bersin dep tileimin", - deidi áiel.
Samat qoryqshy qyzmetin ári qarai jalǵastyramyn dep otyr. Al osy ýaqytqa deiin janynan bir eli ajyramaǵan áieli jibergisi kelmeidi.
"Eń bastysy - jumys emes. Ómirdiń máni – otbasyń men bala-shaǵań. Jibermeimin. Aiyp etpessizder, túsinýge tyrysyńyzdar", - deidi ol.
Eske sala ketsek, marqum Qanysh Nurtazinov I dárejeli "Aibyn" ordenimen nagradtaldy.
Aýrýhana dálizinde tilshilerge suqbat bergen ekologiia ministri vedomstvonyń qandai sharalardy qolǵa alatynyn aitty: zańsyz ańshylyq úshin jazany kúsheitý, qoryqshylardyń materialdyq bazasyn nyǵaitý.
"Sonymen qatar qoryqshylardyń kásibi daiyndyǵymen ainalysamyz. Deńgeiin arttyrý qajet, ol úshin teoriia jáne praktika boiynsha kýrs engizemiz", - dep sózin túiindedi Maǵzum Myrzaǵaliev.
Eske sala ketsek, 2019 jyldyń 23 shildesinde Aqmola oblysy Jarqaiyń aýdanynda qoryqshylarǵa shabýyl jasady degen brakonerler ustaldy. Olar – ákeli-balaly Arqalyq turǵyndary.
