Soltústik Qazaqstan oblysynda ótken táýlikte jolda qalǵan 110 adam qutqarylyp, qar qursaýynda qalǵan 39 tehnika shyǵyaryldy, dep habarlaidy "Ult aqparat".
SQO-da bir aptadan beri boran soǵyp tur. Sol sebepti oblystyń avtojoldarynda jaǵdai kúrdeli.
SQO tótenshe jaǵdailar departamentiniń málimetinshe, tańǵy saǵat 8.00-de SQO-da respýblikalyq mańyzy bar 8 jol ýchaskesi ashyldy. Qazirgi ýaqytta respýblikalyq mańyzy bar 5 jáne barlyq oblystyq mańyzy bar joldar jabyq.
SQO TJD basqarmasynyń bastyǵy Rústem Jumaǵalievtiń aitýynsha, ótken táýlikte 110 adam qutqaryldy. Jergilikti atqarýshy bilik, jol qyzmetteri, politsiianyń jáne TJD birlesken is-qimyly arqasynda qar qursaýynda qalǵan 39 tehnika shyǵaryldy. Eki aýdannyń Kellerovka jáne Pokrovka eldi mekenderinde jylytý pýnktteri jumys istedi.
«Aýa raiy óte qolaisyz boldy. Qol sozym jer kórinbedi. Joldy ashýǵa shyqqan tehnikanyń sońynan qar alyp qalyp jatty. Sol sebepti qutqarý operatsiialaryna arnaiy «TREKOL» kólikterin paidalandyq. Ǵ.Músirepov atyndaǵy aýdannyń ortalyǵy Novoishimkadan osylaisha aýyr syrqat Shal aqyn aýdanyndaǵy Sergeevka ortalyq aýrýhanasyna jetkizildi», - deidi Rústem Jumaǵaliev.
Qutqarý operatsiiasy M. Jumabaev aýdany Malogvardeiskoe eldi mekeninde de júrgizildi. Qutqarýshylar dárigerlerge aiaqtaryn úsik shalǵan 1958 jyly týǵan er adamdy jáne qan qysymy joǵarylaǵan áieldi ortalyq aýrýhanaǵa ákelýge kómektesti.
Jalpy patrýldeýge, joldy tazalaýǵa jáne qutqarý operatsiialaryna barlyǵy 249 qyzmetker jáne 204 tehnika jumyldyryldy.
