Boliviia politsiiasy prezident qyzmetinen ketetini jaily habarlaǵan Evo Moraleske izdeý jariialady. Bul aqparatty Boliviia oppozitsiiasy jetekshileriniń biri Lýis Fernando Kamacho tvitter áleýmettik jelisi arqyly taratty.
Onyń jazýynsha, "politsiia men ásker Moralesti Chapar provintsiiasynan izdep jatyr. Prezidenttiń Boliviia astanasy La-Pastan shyqqan ushaǵy qolǵa túsken".
Morales ózin qamaýǵa alý jaily orderdi zańsyz dep atady. "Qylmyskerler úiime shabýyldady. Tóńkeris zań ústemdigine nuqsan keltirdi", - deidi ol tvitter paraqshasynda.
Meksika Syrtqy ister ministri Marselo Ebrard Meksikanyń Moraleske baspana berýge daiyndyǵyn bildirdi.
Boliviia Prezidenti Evo Morales jappai qarsylyqtan keiin prezident sailaýyn qaita ótkizýge ýáde bergen jáne prezident qyzmetinen túsetinin jariialaǵan.
Moralesten keiin vitse-prezident Alvaro Garsia-Liner, Boliviia parlamenti eki palatasynyń tóraǵalary, birqatar ministrler men orynbasarlary jáne gýbernatorlar ornynan ketken. Munan ózge politsiia Joǵary sailaý sotynyń (sailaý komissiiasy) tóraǵasy men orynbasaryn qamaýǵa alǵan. Olar "20 qazandaǵy prezident sailaýynda zań buzýǵa qatysty" dep aiyptalyp otyr.
Oppozitsiia qarsylyǵy sailaý komissiiasy 20 qazandaǵy prezident sailaýynyń qorytyndysyn jariialaǵannan keiin bastalǵan. Komissiia málimetinshe, tórtinshi ret sailaýǵa túsken prezident Evo Morales 47 paiyzdan astam daýys alǵan, al onyń basty qarsylasy, burynǵy jýrnalist Karlos Mesaǵa berilgen daýys 36 paiyzdan asqan.
10 paiyz aiyrma Moralesti birinshi týrda jeńimpaz dep jariialaýǵa múmkindik beretin edi. Alaida Mesa sailaý nátijelerin moiyndamady. Ol sailaý zańynyń jappai buzylǵanyn alǵa tartyp, ekinshi týr ótkizýdi talap etý úshin jaqtastaryn kóshege shaqyrdy. Boliviianyń birneshe qalasynda politsiiamen qaqtyǵys bolyp, kem degende úsh adam qaza boldy.
