Belgili qarjyger, ekonomist Bolat Jámishev el prezidenti Qasym-Jomart Toqaevtyń bastamasymen qurylǵan "Qazaqstan halqyna" qoǵamdyq áleýmettik qorynyń tóraǵasy bolyp sailandy, dep habarlaidy Spuntik Qazaqstan.
"Qazaqstan halqyna" QÁQ tóraǵasy laýazymyna qordyń qamqorshylyq keńesi Bolat Jámishevtiń kandidatýrasyn usyndy jáne biraýyzdan qoldady", - delingen qor habarlamasynda.
Qor mynadai mindetterdi oryndaidy:
- densaýlyq saqtaý, bilim berý jáne áleýmettik qoldaý, mádeniet jáne sport salalarynda memlekettik qoldaý sharalarynan tys qosymsha qamtamasyz etý máseleleri boiynsha Qazaqstan halqyna qaiyrymdylyq kómek kórsetý;
- tótenshe jaǵdailar kezinde jáne tótenshe jaǵdai rejimin engizý kezinde zardap shekken Qazaqstan halqyna kómek kórsetý;
- halyqtyń jaǵdaiy tómen tobyna jatatyn muqtaj balalar men balalar úshin sport infraqurylymynyń damýyn jáne qoljetimdi bolýyn arttyrýǵa járdemdesý;
- Qazaqstan Respýblikasynyń aýmaq tutastyǵy men qaýipsizdigin qorǵaý kezinde qaza tapqan quqyq qorǵaý organdary, arnaiy organdar qyzmetkerleriniń, áskeri qyzmetshilerdiń otbasylaryn qoldaý.
Qor halyqaralyq qaiyrymdylyq uiymdarynyń qarajaty, lotereia qyzmeti operatory jáne basqa da monopolisterdiń mindetti aýdarymdary, iri biznes tarapynan turaqty aýdarym men kvazimemlekettik sektorǵa arnalǵan qarajattan qarjylandyrylady.
64 jastaǵy Bolat Jámishev – 2020 jyldan bastap áleýmettik meditsinalyq saqtandyrý qory direktorlar keńesiniń tóraǵasy.
Buǵan deiin "Qazaqstannyń damý banki"AQ basqarma tóraǵasy bolǵan.
Ár jyly qarjy ministri, óńirlik damý ministri, Ulttyq bank tóraǵasynyń orynbasary, qarjy uiymdaryn retteý jáne qadaǵalaý agenttiginiń basshysy boldy.
Aita keteri, 11 qańtarda Memleket basshysy "Qazaqstan halqyna" qoǵamdyq áleýmettik qoryn qurýdy tapsyrdy.
Prezident qoǵamdyq áleýmettik qor densaýlyq saqtaý, bilim, áleýmettik qoldaý salasynda naqty problemalardy sheshýmen ainalysatynyn aitty.
"Mysaly, sirek aýrýǵa shaldyqqan balalarǵa kómektesedi. Qalalarda, aýdandarda, aýyldarda balalarǵa arnalǵan sporttyq alańdar salamyz. Qabiletti balalarǵa járdemdesemiz. Mádenietke qoldaý kórsetemiz. Almatyǵa jantúrshigerlik tragediiadan keiin ońalýǵa kómektesemiz. Osy qordyń qarajatynan biz qaza bolǵan politseiler men áskeri qyzmetshilerdiń otbasylaryna qolǵabys etemiz. Jáne bul tek ber jaǵy ǵana", - dedi Prezident.
Toqaevtyń aitýynsha, bul Prezidenttiń, Úkimettiń nemese qandai da bir memlekettik organnyń qory emes, barsha qazaqstandyqtyń qory bolady.
"Bul - halyq qory. Ol ákimshiliktiń nemese úkimettiń janynan qurylmaidy. Bedeldi baqylaý keńesi qurylady. Adal, jaýapty basshy taǵaiyndalady. Onyń qyzmeti tolyǵymen ashyq bolady, qoǵamǵa esep beredi. Josparlary, biýdjeti men jobalary saitta jariialanady. Búkil aqparat ashyq bolady", - dedi qor jaily Prezident.
Memleket basshysy úkimetke kompaniialar tobyn anyqtaýdy jáne olarmen qorǵa jyl saiyn quiatyn jarna mólsherin kelisýdi tapsyrdy.
"Qazaqstan halqyna" Qorynyń joǵary basqarý organy – Qorǵa qatysýshylardyń jalpy jinalysy, baqylaýshy organ – Qamqorshylyq keńes, atqarýshy organ – Basqarma, baqylaýshy organ-tekserý komissiiasy bolyp tabylady.
Sondai-aq biznes-qoǵamdastyq ókilderi men janashyr azamattar "Qazaqstan halqyna" qorynyń shotyna qarajat aýdara alady:
«Qazaqstan halqyna» Qoǵamdyq Qory, JSN/BSN: 220140006999, Kbe 18, KZ97601A871001692501 KZT, «Qazaqstan halyq banki» AQ.
«Qazaqstan halqyna» Qoǵamdyq Qory, JSN/BSN: 220140006999, Kbe 18, KZ52722S000011856768, AO «Kaspi bank».
