«Bolashaq» halyqaralyq stipendiiasyn taǵaiyndaý úshin úmitkerlerdi irikteýdiń jańa erejesi bekitildi, dep habarlaidy "Ult aqparat" «Halyqaralyq baǵdarlamalar ortalyǵy» AQ baspasóz qyzmetine silteme jasap.
QR Úkimetiniń 2020 jylǵy 6 mamyrdaǵy №271 qaýlysymen «Bolashaq» halyqaralyq stipendiiasyn taǵaiyndaý úshin úmitkerlerdi irikteý jáne «Bolashaq» halyqaralyq stipendiiasyn jumsaý baǵyttaryn anyqtaý erejelerine ózgerister engizildi.
«Bolashaq» halyqaralyq stipendiiasyna úmitkerlerdi irikteýdiń jańa erejeleri barlyǵyna birdei múmkindikter usynady. Barlyq kvotalyq sanattar alynyp tastalǵan. Biyldan bastap «Bolashaq» stipendiiasynyń konkýrsyna aýyldyq eldimekenderden kelgen úmitkerlerdi qospaǵanda, jetekshi sheteldik joǵary oqý oryndarynan shartsyz shaqyrtýǵa ie talapkerler ǵana qatysa alady», delingen habarlamada.
Ózgerister eń aldymen «Bolashaq» stipendiiasyna úmitkerlerdi konkýrstyq irikteý protsesine, sondai-aq konkýrsqa qatysýdyń bastapqy talaptaryna qatysty.
«Konkýrstyq kezeń sany 6-dan 3-ke deiin qysqartyldy, atap aitqanda ýájdemelik pen usynys hattardy baǵalaýdyń irikteý kezeńi, sonymen qatar memlekettik jáne shet tilin bilýge arnalǵan kezeń alynyp tastaldy. Úmitkerler ózdiginen test tapsyryp, qujat ótkizgen kezde memlekettik tildi bilý týraly sertifikatyn usynýy kerek. Aýylan kelgen úmitkerler qosymsha shet tilin bilý týraly sertifikatty usynady», delingen habarlamada.
Memlekettik tildi bilý deńgeiin anyqtaýǵa arnalǵan synaq Ulttyq testileý ortalyǵynyń aimaqtyq filialdarynda ótkiziledi.
Irikteý kezeńderi mynalardy qamtidy:
1-kezeń: Intellektýaldy qabilet deńgeiin, jeke jáne iskerlik qabiletin, shetelde oqýǵa psihologiialyq daiyndyǵyn anyqtaityn keshendi test;
2-kezeń: Táýelsiz sarapshylar komissiiasynyń múshelerimen jeke suhbat;
3-kezeń: Shetelde kadrlardy daiarlaý jónindegi respýblikalyq komissiianyń otyrysy.
Aita keterligi, jańa erejede aldyn-ala tildik oqytý alynyp tastaldy. Ol tek aýyldan kelgen talapkerler úshin saqtalady jáne 6 ai merzimi ishinde aǵylshyn tilin úirený Qazaqstan aýmaǵynda ótkiziledi.
«Bolashaq» stipendiiasyna úmitkerlerdi irikteýdiń jańa erejelerine sáikes, aýyldyq eldi mekenderden qatysatyn úmitkerler tek sońǵy 3 jyl ishinde aýyldyq jerlerde turyp jáne onyń 2 jylyn jumys isteýge arnaǵan jaǵdaida ǵana konkýrsqa qatysa alady.
Basymdyq berilgen mamandyqtar tizbesi eńbek naryǵy qajettiliginiń orta merzimdi boljamyn eskere otyryp, QR Bilim jáne ǵylym ministrligi jasaidy», delingen habarlamada.
2020 jylǵa arnalǵan «Bolashaq» stipendiiasyn taǵaiyndaý konkýrsynyń jeńimpazdaryna usynynylatyn jetekshi sheteldik joǵary oqý oryndarynyń, sheteldik uiymdardyń jáne tildik kýrstar tiziminiń jobasy qazir kelisilip jatyr.
Álemniń jetekshi ýniversitetteri tiziminiń jobasy mynadai halyqaralyq akademiialyq reitingter boiynsha anyqtalady: QS World University Rankings, Academic Ranking of World Universities, Times Higher Education World University Rankings, The U.S. News & World Report Best Global University Ranking.
Sonymen qatar, Táýelsiz sarapshylar komissiiasynyń quramy men jumys reglamentine ózgeris engizilýde. Komissiia jumysyn qatań rettei otyryp, onyń ashyqtyǵyn barynsha kúsheitý josparlanýda.
Aita keterligi, «Bolashaq» halyqaralyq stipendiiasy QR Prezidentiniń 1993 jylǵy 5 qarashadaǵy №1394 qaýlysymen bekitilgen. 26 jyly ishinde baǵdarlama boiynsha 13 870 stipendiia taǵaiyndaldy, onyń ishinde túrli salalarda 10 747 maman oqytyldy.
