© Sputnik / Vladislav Vodnev
2023 jyldan bastap sheteldik ýniversitet, jumys berýshi nemese uiym tarapynan akademiialyq oqýǵa granty bar «Bolashaq» baǵdarlamasynyń stipendiattary úshin mindetti eńbekpen óteý merzimi bir jylǵa qysqartyldy, dep habarlaidy "Ult aqparat" Halyqaralyq baǵdarlamalar ortalyǵy baspasóz qyzmetine silteme jasap.
«Biyl «Bolashaq» stipendiiasy aiasynda úmitkerlerdi irikteý qaǵidalary jetildirildi. Endi konkýrsqa sheteldik joǵary oqý orny nemese uiym tarapynan akademiialyq oqýǵa granty bar úmitkerler de qatysa alady. Mundai túlekter úshin Astana, Almaty jáne Shymkent qalalarynda eńbekpen óteý merzimi bes jyldan tórt jylǵa, óńirlerde – úsh jyldan eki jylǵa qysqartylady», - deidi «Halyqaralyq baǵdarlamalar ortalyǵy» AQ Basqarma tóraǵasy Ánýar Janǵozin.
Sondai-aq ol «Bolashaq» baǵdarlamasy turý, tamaqtaný, meditsinalyq saqtandyrý, ushý, vizalyq alymdar, oqý materialdaryn satyp alý shyǵyndaryn óteitinin atap ótti. Bul - qazaqstandyqtardyń múmkindikterin arttyrady, sonymen qatar biýdjet qarajatyn aitarlyqtai únemdeidi.
Jetekshi sheteldik JOO-da oqýǵa granty bar úmitkerler «Bolashaq» baǵdarlamasynyń konkýrsyna qatysý úshin sheteldik ýniversitetke óteýsiz negizde qabyldanǵanyn rastaityn qujattardyń kóshirmelerin usynýy tiis. Grant búkil oqý kezeńi ishinde akademiialyq oqý aqysyn óteýi kerek.
