Foto: freepik.com
Oqý-aǵartý ministrligi "Bolashaq" halyqaralyq stipendiiasynyń eńbekpen óteý erejesine ózgeris engizýdi usyndy. Buiryqtyń jobasy "Ashyq NQA" portalynda jariialandy, dep habarlaidy Sputnik Qazaqstan.
Qujatqa sáikes, stipendiiany eńbekpen óteý mindetin taǵy tórt sebeppen keiinge shegerýge bolady. Erejeniń 28-2 tarmaǵyna 5,6,7 jáne 8 tarmaqshalar qosylyp otyr. Jańa redaktsiiada eńbekpen óteý mindetin keiinge shegerý sebepteri bylai jazylady:
1.
eńbek qyzmetin júzege asyrýǵa kedergi bolǵan aýrýdy emdeý;
2.
shetelde oqityn zaiybymen nemese jubaiymen ilesip júrý;
3.
memlekettik nemese áskeri qyzmetshi bolyp tabylatyn jáne shetelge ýaqytsha jumysqa nemese qyzmetten ótýge jiberilgen zaiybymen nemese jubaiymen ilesip júrý;
4.
júktilik jaǵdaiy, sondai-aq úsh jasqa deiin balany (balalardy) tárbieleý;
5.
irikteý qaǵidalarynyń 8-tarmaǵyna sáikes "Bolashaq" baǵdarlamasy sheńberindegi oqýdy qospaǵanda, doktorantýra baǵdarlamasy boiynsha akademiialyq oqýdy jalǵastyrý;
6.
Stipendiat aǵymdaǵy jyly shetelde akademiialyq oqýyn aiaqtaǵan kezde 12 aidan aspaityn eńbekpen óteý boiynsha mindettemelerdi oryndaýdy keiinge qaldyrýdy usyný týraly stipendiattyń ótinish bergen sátinde reitingterdiń sońǵy jariialanymdaryna sáikes álemniń úzdik uiymdarynyń ("Fortune Global 500", "Forbes Global 2000", "Forbes Top 100 Digital Companies"") álemdik reitingterine kiretin uiymdarda óndiristik taǵylymdamadan ótý;
7.
Qazaqstan Respýblikasynyń sheginen tys ornalasqan 12 aidan aspaityn merzimge Birikken Ulttar Uiymynyń halyqaralyq uiymdarynda;
8.
alǵan mamandyǵy boiynsha 12 aidan aspaityn merzimge posdoktorantýradan ótý.
"Eńbekpen óteýdi keiinge qaldyrý múmkindigi qaǵidalardyń osy tarmaǵynyń 5), 6), 7) jáne 8) tarmaqshalarynda kórsetilgen jaǵdailarda bir ret beriledi", - delingen buiryqta.
