Halyqaralyq olimpiada komiteti bokstan Tokio Olimpiadasyna joldama beretin irikteý jarystarynyń ýaqytyn bekitti. Bul týraly Ulttyq olimpiada komitetinen habarlady.
HOK Atqarýshy komitetiniń Lozannada ótken otyrysynda 2020 jylǵy Tokio oiyndaryna irikteý básekesin ótkizýge qatysty qosymsha usynystar jasaldy.
Irikteý týrnirleri 2020 jyldyń qańtary men mamyry aralyǵynda ótedi. Jalpy esebi tórt báseke josparlanǵan. Onyń bireýi álemdik irikteý básekesi. Irikteý syndary Olimpiada oiyndaryn ótkizgen nemese tórtjyldyq dodasyn endi qabyldaityn qalalarda uiymdastyrylady.
Qurlyqtyq doda 2020 jyldyń 1 qańtary men 20 sáýiri aralyǵynda ótedi. Aziia jáne Okeaniia aimaqtyq irikteý básekesine qazaqstandyq boksshylar da qatyspaqshy. Bul aimaqta erler arasynda 41, áielder arasynda 22 joldama sarapqa salynady.
Erler arasyndaǵy joldamalar tómendegi retpen beriledi: 52, 57 jáne 63 kelige deiingi salmaq dárejesine alty kvota, 69, 75 jáne 81 kelige deiingi salmaq dárejesine bes kvota, 91 jáne asa aýyr salmaqta tórt kvotadan bólingen.
Áielder arasyndaǵy qurlyqtyq týrnirde litsenziia tómendegi ádispen taratylady: 51 kelige deiingi salmaq dárejesinde alty kvota, qalǵan tórt salmaqqa (57, 60, 69, 75 kelige deiingi salmaq dárejesi) tórt kvotadan beriledi.
Atalǵan týrnirlerde litsenziiaǵa ielik ete almaǵan boksshylar 2020 jyldyń mamyrynda ótetin álem chempionatynda baq synaidy. Álemdik dodada erler arasynda 31-35, áielder arasynda 19-21 kvota sarapqa salynbaq.
Tokio Olimpiadasyndaǵy boks básekesi 2020 jyldyń 25 shildesi men 9 tamyzy aralyǵynda ótedi.
Boksshylardyń olimpiada oiyndaryndaǵy salmaq dárejesine ózgerister engizildi
