Iordaniianyń Amman qalasynda ótip jatqan bokstan Olimpiadaǵa irikteý týrniriniń jartylai finalynda qos qazaq bir-birimen qolǵap túiistirdi, dep habarlaidy "Ult aqparat".
Atalǵan Olimpiadalyq týrnirde 75 keli salmaqta otandasymyz Ábilhan Amanqul jartylai finalǵa shyqqan bolatyn. Týra osy salmaqta Qytai eliniń namysyn qorǵap júrgen, sol elde turatyn qandasymyz Tańathan Toqtarbek te Olimpiada oiyndaryna joldama utyp, jartylai finalǵa joldama alǵan edi.
Qos qazaq arasyndaǵy aiqas birden tartysty bastaldy. Birinshi raýnd qorytyndysy boiynsha 5 tóreshiniń úsheýi Qytaidaǵy qandasymyzdy jeńimpaz dep tapsa, ekeýi qazaqstandyq boksshyǵa daýys berdi. Al ekinshi raýndta jerlesimiz qarqynyn údetip, tarazy basyn ózine aýdardy. Tóreshilerdiń sheshimi boiynsha 3:2 upaimen alǵa shyqty. Sońǵy sheshýshi raýndta eki boksshy da aianyp qalǵan joq, biri-birine alma-kezek soqqylaryn ótkizip jatty. Bir qaraǵanda teń dárejede ótken siiaqty kóringenimen tóreshilerdiń sheshimimen qazaqstandyq boksshy jeńimpaz atandy.
Osylaisha, Qytaidyń namysyn qorǵap júrgen qandasymyz Olimpiadalyq irikteý týrniriniń qola júldegeri atansa, Ábilhan Amanqul qazaq boksshylarynan úshinshi bolyp finalǵa shyqty.
Esterińizge sala ketsek, osyǵan deiin erler arasynda 69 keli salmaqta Abylaihan Júsipov pen 57 kelige deiingi salmaqta Serik Temirjanov qola medal jeńip alsa, 63 kelide el namysyn qorǵap jatqan otandasymyz Zakir Safiýllin men 91 keli salmaqtaǵy boksshymyz Vasilii Levit finalǵa ótken bolatyn.
