يوردانييانىڭ اممان قالاسىندا ٶتٸپ جاتقان بوكستان وليمپياداعا ٸرٸكتەۋ تۋرنيرٸنٸڭ جارتىلاي فينالىندا قوس قازاق بٸر-بٸرٸمەن قولعاپ تٷيٸستٸردٸ, دەپ حابارلايدى "ۇلت اقپارات".
اتالعان وليمپيادالىق تۋرنيردە 75 كەلٸ سالماقتا وتانداسىمىز ەبٸلحان امانقۇل جارتىلاي فينالعا شىققان بولاتىن. تۋرا وسى سالماقتا قىتاي ەلٸنٸڭ نامىسىن قورعاپ جٷرگەن, سول ەلدە تۇراتىن قانداسىمىز تاڭاتحان توقتاربەك تە وليمپيادا ويىندارىنا جولداما ۇتىپ, جارتىلاي فينالعا جولداما العان ەدٸ.
قوس قازاق اراسىنداعى ايقاس بٸردەن تارتىستى باستالدى. بٸرٸنشٸ راۋند قورىتىندىسى بويىنشا 5 تٶرەشٸنٸڭ ٷشەۋٸ قىتايداعى قانداسىمىزدى جەڭٸمپاز دەپ تاپسا, ەكەۋٸ قازاقستاندىق بوكسشىعا داۋىس بەردٸ. ال ەكٸنشٸ راۋندتا جەرلەسٸمٸز قارقىنىن ٷدەتٸپ, تارازى باسىن ٶزٸنە اۋداردى. تٶرەشٸلەردٸڭ شەشٸمٸ بويىنشا 3:2 ۇپايمەن العا شىقتى. سوڭعى شەشۋشٸ راۋندتا ەكٸ بوكسشى دا ايانىپ قالعان جوق, بٸرٸ-بٸرٸنە الما-كەزەك سوققىلارىن ٶتكٸزٸپ جاتتى. بٸر قاراعاندا تەڭ دەرەجەدە ٶتكەن سيياقتى كٶرٸنگەنٸمەن تٶرەشٸلەردٸڭ شەشٸمٸمەن قازاقستاندىق بوكسشى جەڭٸمپاز اتاندى.
وسىلايشا, قىتايدىڭ نامىسىن قورعاپ جٷرگەن قانداسىمىز وليمپيادالىق ٸرٸكتەۋ تۋرنيرٸنٸڭ قولا جٷلدەگەرٸ اتانسا, ەبٸلحان امانقۇل قازاق بوكسشىلارىنان ٷشٸنشٸ بولىپ فينالعا شىقتى.
ەستەرٸڭٸزگە سالا كەتسەك, وسىعان دەيٸن ەرلەر اراسىندا 69 كەلٸ سالماقتا ابىلايحان جٷسٸپوۆ پەن 57 كەلٸگە دەيٸنگٸ سالماقتا سەرٸك تەمٸرجانوۆ قولا مەدال جەڭٸپ السا, 63 كەلٸدە ەل نامىسىن قورعاپ جاتقان وتانداسىمىز زاكير سافيۋللين مەن 91 كەلٸ سالماقتاعى بوكسشىمىز ۆاسيليي لەۆيت فينالعا ٶتكەن بولاتىن.
