Blokpostaǵy kólik apatynan qaza tapqan eki politseidiń týystary kináli júrgizýshini keshirmedi, dep habarlaidy QazAqparat.
Azat Azamatovqa qatysty isti Qarasai aýdandyq sotynyń sýdiasy Mádi Kóshekbaev qarap jatyr.
Sot barysynda prokýror men qorǵaýshylar qaitys bolǵan politseilerdiń týystary men dostarynan da jaýap aldy.
Oqiǵa ornynda mert bolǵan 42 jastaǵy aǵa leitenant Jaras Janǵazievtiń áieli kúieýiniń qazasy týraly habardy kórshilerinen estigenin aitty.
«Biz joldasym ekeýmiz ata-enemmen birge turdyq. Jarastyń áriptesteri onyń qaitys bolǵanyn aldymen kórshilerge habarlapty. Olar bizge estirtti»,– deidi jesir áiel.
Qazir ol úsh balany jalǵyz ózi tárbielep otyr. Úlken uly 14 jasta, qyzy 10 jasta jáne kenjesi - 10 ailyq. Ol Qalqaman aýrýhanasynda dáriger bolyp jumys isteidi. Qazir dekrettik demalysta.
«Men kináli adamdy keshirmeimin. Ol ádil jazalansyn», - dedi Janǵazievtiń áieli.
Óz kezeginde, qaza bolǵan Dastan Ábdiqanovtyń áieli Dinara Aman apatqa kináli adamnan moraldyq ziian keltirgeni úshin 1 mln teńge ótemaqy talap etti. Odan bólek, asyraýshysynan aiyrylýyna bailanysty sottalýshy Azat Azamatovtan 36 million teńgeden asa qarajat óndirip alý úshin óziniń talap aryzyn jazyp berdi.
Aita keteiik, Dastan Ábdiqanovtyń jalaqysy jylyna eki millionnan asatyn.
Sot zalynda aiyptalýshy qaza tapqandardyń týystary men dostarynan keshirim surady.
«Men marqumdardyń otbasyna kómekteskim keledi. Keshirim suraimyn. Olar meniń áriptesterim boldy. Alty jyl boiy birge jumys istedik. Jaqsy aralastyq. Men jasaǵan isime qatty ókinemin jáne qolymnan kelgenshe kómektesýge daiynmyn», - dedi Azamatov.
Sondai-aq, ol 1 million teńge kólemindegi moraldyq ziiandy ótei alatynyn málim etti. Sonymen qatar, dál qazirgi ýaqytta 36 million teńgeni berýge daiyn emestigin jetkizdi. Ol naqty jaýapty kelesi sot otyrysynda beredi.
Eske sala keteiik, biz buǵan deiin Azat Azamatovtyń ózi kinásin tolyq moiyndaǵanyn jazǵan bolatynbyz.
