Batys Qazaqstan oblysynda úsh turǵyn 805 dana kiik múiizimen ustaldy, dep habarlaidy "Ult aqparat".
BQO politsiia departamentiniń resmi ókili Bolatbek Belgibekovtiń málim etkenindei, oqiǵa Bókei ordasy aýdanynda boldy.
Jedel izdestirý sharalary barysynda Saiqyn-Bisen jolynyń 26-shaqyrymynda 1994 jylǵy eki jáne 1982 jylǵy bir turǵyn qolǵa tústi. Olar otyrǵan «VAZ-21214» avtokóliginen segiz qapshyqqa salynǵan 805 dana kiik múiizi tabylyp, tárkilendi.
Qazirgi kezde QR QK 339-baby 1-1-bóligine (kiikti zańsyz qolǵa túsirý, joiý, sol siiaqty zańsyz qolǵa túsirilgen kiikti nemese onyń derivattaryn, onyń ishinde múiizderin iemdený, saqtaý, ótkizý, ákelý, áketý, jóneltý, tasymaldaý) sáikes sotqa deiingi tergeý amaldary júrgizilýde. Bul bap boiynsha aiypty dep tanylǵandar 3 jyldan 12 jylǵa deiin bas bostandyǵynan aiyrylýy múmkin.
Qylmystyq is boiynsha birneshe saraptama taǵaiyndaldy. Ustalǵan adamdardyń basqa da qylmystarǵa qatystylyǵy, olardyń sybailastary, múiizdi ótkizetin oryndary anyqtalýda.
«Bul múiizderdiń quny shamamen 2 mlrd teńgeni quraidy. Bul sońǵy jyldary brakonerlerden tárkilengen eń iri partiia bolyp esepteledi. Ótken jyly kiiktiń derivattarymen zańsyz ainalysý boiynsha 61 derek tirkelip, sonyń 30-y sotqa deiin jetti. Biyl 17 derektiń 8-i sotqa joldanyp úlgerdi. Qalǵan derekter boiynsha tergeý amaldary jalǵasýda», dedi QazAqparat tilshisine B.Belgibekov.
