Batys Qazaqstan oblysynyń úsh aýdanynda aerodrom salý kózdelýde, dep habarlaidy "Ult aqparat".
BQO jolaýshylar kóligi jáne avtomobil joldary basqarmasy basshysynyń orynbasary Qazbek Meńeevtiń óńirlik kommýnikatsiialar qyzmeti alańynda ótken brifingide málim etkenindei, Bókei ordasy, Jánibek jáne Qaztalov aýdany ortalyqtarynda úsh aerodrom salý úshin tehnikalyq-ekonomikalyq negizdeme ázirlengen.
Qazirgi tańda tehnikalyq-ekonomikalyq negizdeme memlekettik saraptamadan ótýde.
Onyń sózine qaraǵanda, shalǵai aýdan ortalyqtarynda áýejai salynsa, bul sol aýdandardyń damýyna oń áser etedi, ishki týrizmdi damytýǵa múmkindik beredi. Eń bastysy, Oral men atalǵan aýdandar arasynda úzdiksiz áýe qatynasy ornaidy.
Kúni búgin Oraldaǵy áýejai arqyly Nur-Sultan, Almaty, Atyraý, Aqtaý jáne Frankfýrt qalalaryna ushaqtar qatynaidy.
«Oral» ÁKK» UK» AQ «Oral» halyqaralyq áýejaiy» JShS-men birlesip, Oral qalasynyń áýejaiyn qaita jańartý jobasyn júzege asyrýda. Bul jumystar «QPO b.v.» kompaniiasynyń áleýmettik-investitsiialyq jobalary aiasynda qarjylandyrylýda. Bas merdiger – «KazConstructionGroup» JShS.
Qaita jańartý barysynda terminal aýmaǵy 4 myńnan 7 myń sharshy metrge deiin ulǵaitylmaqshy. Turaqtar uiymdastyrylyp, aýmaq mańy abattandyrylady. Sondai-aq aerovokzal terminalynyń tehnologiialyq qural-jabdyqtary 1,2 mlrd teńgege jańartylyp, halyqaralyq standartqa, shekara jáne kedendik baqylaý talaptaryna sáikestendiriledi. Qaita jańartý quny shamamen 2 mlrd teńgeni quraidy.
«Qazirgi ýaqytta ǵimarat tolyqtai buzyldy. Jobaǵa túzetýler engizildi. Onyń jobalaýshysy – «Kýlman» JShS. Ǵimaratqa qaitadan tehnikalyq tekserýler júrgizilip, jer teliminiń topografiialyq túsirilimi jasaldy. Ǵimaratty jobalaý kelisilip, eskizdik joba da daiyndaldy. Eski ǵimarattyń aýmaǵy 3850 sharshy metr bolsa, qaita jańǵyrtýdan keiin 7 myńǵa jetpekshi. Áýejai jylyna 267 myń jolaýshyny qabyldai alatyn bolady. Qaita jańartý jumystaryn 2021 jyly aiaqtaý josparlanyp otyr», dedi Q.Meńeev.
