Batys Qazaqstanmen kórshiles Resei oblystarynda koronavirýs kóp tirkelip otyr. Bul týraly oblys ákimi Ǵali Esqalievtiń tóraǵalaǵymen ótken koronavirýstyń aldyn alý jónindegi oblystyq jedel shtab otyrysynda aityldy, dep habarlaidy "Ult aqparat".
Onda óńir basshysy atap ótkenindei, sarapshy mamandardyń kúz ailarynda koronavirýstyń órshitini týraly boljamy rastala bastady.
«Damyǵan elderde koronavirýsqa tosqaýyl qoiý maqsatynda qatań karantindik sharalar qabyldanýda. Bizdiń óńirmen kórshiles Resei oblystarynda turǵyndar arasynda indettiń ósýi alańdatpai qoimaidy. Ótken kóktemde de koronavirýs juqtyrǵandar bastapqyda Resei men Atyraý oblysyndaǵy Teńiz kenishinen kelgender arasynan kóp tirkelgen bolatyn. Sondyqtan saqtyq sharalaryn kúsheitý kerek», dedi Ǵ.Esqaliev.
Oblystyq densaýlyq saqtaý basqarmasynyń basshysy Bolatbek Qaiýpovtyń aitýynsha, maýsymdyq aýrýlarǵa bailanysty koronavirýstyń ekinshi tolqyny qaýip tóndirip otyrǵanyn kórshiles elderge, ásirese, Reseige qarap kórýge bolady. Reseidegi koronavirýspen aýyrǵandar sany mamyrdaǵy deńgeige jetti. Táýligine 10 myńnan astam indet juqtyrǵandar anyqtalýda. Sonyń ishinde Batys Qazaqstanmen kórshiles Orynbor oblysynda táýligine – koronavirýske shaldyqqan 115, Samarada – 114, Saratovta – 128, Volgogradta 129 adam tirkelip otyr.
«Qazirgi tańda koronavirýstyń ekinshi tolqynyna barynsha daiyndalýdamyz. Dári-dármek qoryn jasaqtap, kadrlar men statsionardy, jedel járdem bólimshesin ázirledik. Ótkennen sabaq alyp, bárin de eskerýge tyrysýdamyz. Alaida turǵyndar óz densaýlyǵyna jaýapty qarap, ózderi men jaqyndaryn indetten saqtaýǵa mán bermese, mundai daiyndyqtyń esh ketýi yqtimal», dedi B.Qaiýpov.
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Muhamǵali Aryspaevtyń málim etkenindei, óńirde ótken qyrkúiek aiynda 111 turǵyn koronavirýs juqtyrsa, sonyń 33-i Oral qalasy, 11-i Terekti, 9-y Báiterek aýdanynyń úlesine tiedi.
M.Aryspaev indettiń aldyn alý maqsatynda Reseimen shekarada ornalasqan barlyq ótkizý beketteriniń sanepidemiolog mamandardyń airyqsha baqylaýyna alynatyn jetkizdi.
Otyrysta jeke qorǵanys quraldarynyń jetkilikti jáne qoljetimdi baǵamen satylyp jatqany aityldy.
Ǵ.Esqaliev turǵyndar arasynda indettiń taralmaýy úshin qoǵamdyq kólikke jolaýshylardyń tek betperdemen kirýin qamtamasyz etý, kópqabatty úilerde jylýdy ádettegiden bir apta buryn berý jáne basqa qaýipsizdik sharalaryn kúsheitý qajettigin atap kórsetti.
