Batys Qazaqstan oblysy mektepterine qazaqtyń uly tulǵalarynyń esimderi berildi, dep habarlaidy "Ult aqparat".
BQO tilderdi damytý basqarmasynyń basshysy mindetin atqarýshy Sveta Ǵanievanyń málim etkenindei, QR Úkimetiniń biylǵy 18 naýryzdaǵy №148 qaýlysyna sáikes óńirdegi 10 mekteptiń ataýy ózgerdi.
Atap aitqanda, oblystyq daryndy balalarǵa arnalǵan mamandandyrylǵan mektep-gimnaziia-internaty men Báiterek aýdanyndaǵy Dariian mektep-gimnaziia-internatyna Abai esimi berildi.
Sondai-aq Báiterek aýdanynda Trekin budan bylai Qadyr Myrza Áli, Pervosovetsk Shoqan Ýálihanov, Shapov Baýyrjan Momyshuly, Batýrin Talǵat Bigeldinov, Novenkii Qasym Qaisenov jáne Ýlianov Iliias Esenberlin atyndaǵy jalpy orta bilim beretin mektep bolyp atalady.
Sonymen qatar Shyńǵyrlaý aýdanynda eki mekteptiń ataýy qazaqshalandy. Belogor negizgi orta bilim beretin mektebi Aqtaý aýylynyń negizgi bilim beretin orta mektebi, Poltava negizgi orta bilim beretin mektep-balabaqshasy Ardaq aýylynyń negizgi bilim beretin orta mektep-balabaqshasy bolyp qaita ataldy.
«Jetkinshek urpaqqa ulttyq rýh berý maqsatynda bilim berý uiymdaryna uly tulǵalarymyzdyń esimin berý jumystary aldaǵy ýaqytta da jalǵasady», dedi Ǵanieva.
