Batys Qazaqstan oblysynda sharýa qojalyqtary basshylarynan para alǵan sheneýnik sottaldy, dep habarlaidy "Ult aqparat".
BQO sybailas jemqorlyqqa qarsy qyzmetinen túsken málimetke qaraǵanda, Qaztalov aýdany kásipkerlik jáne aýyl sharýashylyǵy bóliminiń bas mamany A.Ǵizatýllin 7 jyl 6 ai merzimge bas bostandyǵynan aiyrý jazasyna kesildi.
Sonymen qatar ol Qaztalov aýdandyq sotynyń úkimimen ómir boiyna memlekettik qyzmet atqarý quqyǵynan aiyryldy.
Úkim zańdy kúshine engen joq.
A.Ǵizatýllin 2018 jyly qyzmet babyn asyra paidalana otyryp, sharýa qojalyqtary basshylarynan 390 myń teńge kóleminde para alǵan. Osy qarjyǵa ol jaiylymdardy sýlandyrý infraqurylymyn qurý jáne mal sharýashylyǵyn sýmen qamtamasyz etý shyǵyndaryn óteý úshin sharýa qojalyqtarynyń kedergisiz demeýqarjy alýyna kómektesken.
Atap aitqanda, 2017-2021 jyldarǵa arnalǵan QR agroónerkásip keshenin damytý memlekettik baǵdarlamasy aiasynda birqatar sharýa qojalyqtarynda qudyqtar qazylǵan. Sony teksergen A.Ǵizatýllin qudyqtyń tereńdigin ólshemei, tek syrtqy tekserý jáne sýdyń bar-joǵyn qaraýmen shektelgen. Qudyqtyń tereńdigi sáikes kelmese de, sharýa qojalyqtarynan para alyp, qudyqtar demeýqarjy alýǵa sai keledi dep kórsetken.
Atalǵan qylmystyń jasalýyna yqpal etken jaǵdailardy joiý jóninde sharalar qabyldaý maqsatynda oblys ákimi apparatyna QR Qylmystyq protsess júrgizý kodeksiniń 200-baby tártibinde tiisti usynym jiberildi.
Sonymen qatar tiisti baqylaýdyń joqtyǵy jáne qaraýyndaǵy qyzmetkerlermen aldyn alý jumystarynyń álsizdigi úshin Qaztalov aýdany kásipkerlik jáne aýyl sharýashylyǵy bólimi basshysyn tártiptik jaýapkershilikke tartý týraly máseleni qaraý usynyldy.
