Batys Qazaqstan oblysynda koronavirýs juqtyrǵandar aýrýhanaǵa aýyr halde túsip jatyr, dep habarlaidy "Ult aqparat".
BQO densaýlyq saqtaý basqarmasy basshysynyń orynbasary Gúlnár Ábdirahmanovanyń óńirlik kommýnikatsiialar qyzmeti alańynda málim etkenindei, ásirese, dert jasy ulǵaiǵan jáne sozylmaly aýrýy bar adamdar arasynda aýyr ótýde.
«Ótken jazdaǵy jaǵdai qaitalanbas úshin turǵyndar barlyq aldyn alý sharalaryn saqtap, JRVI belgileri baiqalǵan sátte-aq meditsinalyq kómekke júgingeni jón», dedi Gúlnár Maqsotqyzy.
Oblysta osy kezge deiin 14078 adam indet juqtyrsa, sonyń 11582-si nemese 82,2 paiyzy jazylyp shyqty, 224 adam kóz jumdy.
Qazirgi tańda karantindik statsionarlarda 10 adam emdelýde. Al juqpaly aýrýlar statsionarlarynda 274 adam em alýda. Sonyń ishinde 12-si jansaqtaý bóliminde jatsa, bulardyń bireýi – 50-60, beseýi – 60-80 jas aralyǵyndaǵylar, altaýy – seksennen asqandar. 10 naýqastyń sozylmaly derti bolsa, sonyń jeteýi júrek-qan tamyrlary aýrýlaryna, úsheýi qan diabetine shaldyqqan.
Kúni búgin invazivti emes jasandy tynys alý apparatyna 7, ottegi kontsentratoryna 8, ortalyqtandyrylǵan ottegi kózine 69 naýqas qosylǵan.
