Batys Qazaqstan oblysynda mamandar Kórisý kúni jáne Naýryz meiramyna orai adamdardyń kóp jinalmaýy kerektigin eskertti, dep habarlaidy "Ult aqparat".
BQO Sanitarlyq-epidemiologiialyq baqylaý departamenti basshysynyń orynbasary Nurlybek Mustaevtyń Óńirlik kommýnikatsiialar qyzmeti alańynda málim etkenindei, 14 naýryz – Kórisý jáne Naýryz merekelerine orai jergilikti atqarýshy organdar baǵdarlamalar daiyndaýda.
Nurlybek Mustaevtyń sózine qaraǵanda, bul rette adamdardyń kóp jinalmaýy qajettigi, sanitarlyq-epidemiologiialyq talaptardyń saqtalýy mindetti túrde eskeriledi. Is-sharany uiymdastyrýshylar azyq-túlik taǵamdaryn daiyndamaýy jáne taratpaýy tiis. Sondai-aq áleýmettik araqashyqtyq, betperde rejimi saqtalady.
«Jańa jylǵy meiramnan keiin koronavirýsqa shaldyǵý kórsetkishi kúrt kóbeiip, oblys «qyzyl» aimaqqa kirgendikten, sharalardy qatańdatýǵa májbúr boldyq. Naýryz meiramynan keiin osyndai kúige tap bolmas úshin turǵyndar qonaqtyq sekildi kópshilik is-sharalardan bas tartqany durys», - dedi N.Mustaev.
Onyń aitýynsha, jyl basynan beri óńirde 4446 adam koronavirýs juqtyrdy. Al 1 naýryzdan beri 659 adamnyń indetpen aýyrǵany anyqtaldy. Olarmen qarym-qatynasta bolǵan 1524 adam meditsinalyq baqylaýǵa alyndy.
Syrqattanǵandardyń 226-sy nemese 34,2 paiyzy buryn aýyrǵandarmen bailanysta bolsa, 162-si nemese 24,5 paiyzy saýda úileri, bazarlar, meditsina uiymdary siiaqty adam kóp jinalatyn oryndarda, 185-i nemese 28 paiyzy qoǵamdyq kólikte, 65-i nemese 9,8 paiyzy toi-sadaqalarǵa qatysqan kezde juqtyrǵan.
Oblystyq Densaýlyq saqtaý basqarmasy basshysynyń mindetin atqarýshy Arman Qalibekovtiń naqtylaýynsha, qazirgi kezde infektsiialyq aýrýhanalarda naýqastyń tolýy 50 paiyzǵa jýyqtaǵan. Bul – respýblikadaǵy joǵary kórsetkishterdiń biri. Oǵan qosa ambýlatorlyq em alyp jatqandar barshylyq. 8 naýryz meiramynan keiin aýrýshańdyqtyń óskeni baiqalady. Sońǵy táýlikte ǵana 71 adam koronavirýs juqtyrdy.
«Árkim óz densaýlyǵyna jaýapty bolýy kerek. Sondyqtan aldaǵy meiramdar kezinde is-sharalardy beinebailanys, onlain arqyly ótkizýdi usynamyz», - dedi A.Qalibekov.
