Batys Qazaqstan oblysynda kóp jyldyq monitoringke sáikes 36 myńnan astam adam turatyn 85 eldi mekenge sý basý qaýpi tónýi yqtimal, dep habarlaidy "Ult aqparat".
BQO TJ departamentiniń bastyǵy, general-maior Jasulan Jumashevtiń óńirlik kommýnikatsiialar qyzmeti alańynda ótken brifingide málim etkenindei, Oral qalasy, Tasqala, Qaztalov jáne Báiterek aýdandary eń qaýipti aýmaqtar qataryna jatady.
Jasulan Qydyrǵojaulynyń sózine qaraǵanda, eldi mekenderdi sý basý qaýpiniń úsh deńgeii anyqtalǵan. Atap aitqanda, 27 eldi meken sý basýdyń joǵary, 50 aýyl ortasha, taǵy 8-i tómen deńgeiine jatqyzylǵan.
Qazirgi tańda «Qazgidromet» RMK BQO filialynyń málimeti boiynsha qardyń biiktigi – 35 sm, topyraqtyń qatý kórsetkishi – 35-69 sm. Shyńǵyrlaý, Shejin 2, Óleńti jáne Shiderti ózenderinde ylǵal qory qalypty deńgeide. Derkól men Shaǵan ózenderinde kóp jyldyq kórsetkishterden 13-16 paiyzǵa tómen.
«Oblystaǵy kóktemgi sý tasqyny shekaralyq ózenderdiń tabiǵi aǵysyna ǵana emes, sonymen qatar Resei aýmaǵynda ornalasqan sý qoimalarynan jiberiletin sý kólemine de bailanysty. Osy oraida reseilik áriptestermen sý tasqyny, atap aitqanda, Orynbor jáne Saratov oblystaryndaǵy Irikla men Varfolomeev sý qoimalaryn qaýipsiz jáne ózara tiimdi paidalaný máseleleri boiynsha aqparat almasyp otyramyz», dedi J.Jumashev.
Oǵan qosa túsken qardy ýaqtyly jinap, qala men eldi mekenderden der kezinde shyǵarýdyń da mańyzy zor. Qazirgi kezde erigen qar sýynyń basý qaýpi bar ýchaskelerdi tekserý jumystary júrgizilýde.
Kúni búgin eldi mekenderden 494 myńnan astam tekshe metr qar shyǵaryldy. 1150-den astam tekshe metr erigen sý soryldy. Kóktem kezindegi tótenshe jaǵdailardy joiý jumystaryna 2591 adam, 734 tehnika, 45 júzý quraly, 295 motopompa tartylmaqshy.
Oblys boiynsha túrli sipattaǵy tótenshe jaǵdailardy joiýǵa rezervte 1,5 mlrd teńge qarastyryldy.
