Batys Qazaqstan oblysynda 451 myń gektar aýyl sharýashylyǵy jeri paidalanylmai otyr, dep habarlaidy QazAqparat.
BQO jer qatynastary basqarmasynyń basshysy Murat Ómirálievtiń Óńirlik kommýnikatsiialar qyzmeti alańynda ótken brifingide málim etkenindei, 2019-2022 jyldary oblys boiynsha 1 mln 389 myń gektar jerdiń paidalanylmai jatqany anyqtalǵan.
Sonyń ishinde biyl 196 myń gektardyń igerilmegeni belgili boldy.
Basqarma basshysynyń sózine qaraǵanda, jergilikti atqarýshy organdar tarapynan júrgizilgen jumystardyń nátijesinde 220 myń gektar jer memleket menshigine qaitaryldy.
Sondai-aq 718 myń gektardy jer telimderiniń paidalanýshylary maqsatyna sai igerýge kiristi.
M.Ómirálievtiń aitýynsha, aýyl sharýashylyǵy jerlerine baqylaýdy kúsheitý maqsatynda mańyzdy qadam jasalyp, biyl baqylaý qyzmeti ortalyq ýákiletti organǵa qaitaryldy. Iaǵni jerdi ákimdikter bergenimen, onyń paidalanylýyn baqylaý men qadaǵalaý oblys deńgeiinde qurylǵan jer resýrstaryn basqarý departamentine júkteldi.
«Osyǵan orai paidalanylmai jatqan 451 myń gektar jer telimderi boiynsha materialdar atalǵan departamentke tekserý júrgizý úshin joldanýda. Sonymen qatar paidalanylmai jatqan jerlerdi ainalymǵa engizýdi jedeldetý jáne baqylaýdy kúsheitý maqsatynda tekserý men májbúrlep alyp qoiý merzimi 2 jyldan 1 jylǵa qysqartyldy», - dedi basqarma basshysy.
Oblysta aýyl sharýashylyǵy maqsatyndaǵy jalpy jer kólemi 7 mln 756 myń gektar bolsa, sonyń 564,3 myńy – egistik, 1,9 myńy – kópjyldyq ekpeler, 536,1 myńy – tyńaiǵan jerler, 500,5 myńy – shabyndyq, 6097 myńy – jaiylym, 56 myńy – ózge de alqaptar.
«Aýyl sharýashylyǵy maqsatyndaǵy jerlerdiń konkýrs arqyly tabystalatyny belgili. Oblys kóleminde aýyl sharýashylyǵy jerlerin óndiristik qyzmetke tartý maqsatynda 2021-2022 jyldar aralyǵynda 67 konkýrs ótkizilip, 3 myńǵa jýyq (2679) ótinim qabyldandy. Nátijesinde 499 myń gektardy quraityn 677 jer telimi tabystaldy. Biyl aýdandyq ákimdikter 80 myń gektardy quraityn 133 jer telimi boiynsha 12 konkýrs ótkizýdi josparlap otyr», dedi Ómiráliev.
