Batys Qazaqstan oblysynda 20 eldi mekendi sý basý qaýpi seiilmei otyr. Bul týraly kóktemgi sý tasqynyna qarsy sharalarǵa arnalǵan brifingte aityldy, dep habarlaidy QazAqparat tilshisi.
Oblys ákiminiń orynbasary Baǵdat Azbaevtyń sózine qaraǵanda, Tasqala, Báiterek aýdandary men Oral qalasy mańyndaǵy eldi mekenderge kóbirek qaýip tónip tur.
Biyl qar mol tústi. Mundai jaǵdai sońǵy otyz jyldan astam ýaqyttan beri oryn almaǵan edi.
«Qazgidromet» RMK derekteri boiynsha biylǵy aqpanda ózen-kólderdegi ylǵal qory 50-100 paiyzǵa joǵary boldy. Qar 1,5-3 ese kóp tústi. Topyraqtyń qatý tereńdigi 30-50 santimetrdi qurady.
Bastapqyda oblysta 36 myńnan astam adam turatyn 88 eldi mekendi sý basý qaýpi bar delinse, qazir ol 20-ǵa deiin tómendedi.
Oblys kóleminde qala men aýyldardan 1,5 mln astam tekshe metr qar shyǵarylyp, 56 myń tekshe metr sý soryldy. 110 myń metr arna, aryqtar tazartylyp, bóget bekitý, muz kesý jumystary da júrgizildi.
Kóktemgi sý tasqynyna qarsy sharalarǵa 885 mln teńge bólindi.
Oral qalasynyń ákimi Murat Muqaev shahardaǵy kommýnaldyq mekemelerdiń 19 qarashada qar túskennen beri tórt ai boiy tynym tappai jumys jasaǵanyn jetkizdi. Bul jumystarǵa 400-ge jýyq qyzmetker, 350-den astam tehnika jumyldyryldy. Buryn qar jinaityn 2 poligon bolsa, biyl onyń sany jeteýge jetip, bári de qarǵa toldy. Buǵan «Jaiyq taza qala», «Oral taza servis» mekemeleri men qurylys, jol kompaniialary súbeli úles qosqanyn aitýǵa bolady.
BQO TJ departamentiniń bastyǵy Jasulan Jumashevtiń aitýynsha, óńirdegi ózenderdiń deni bastaýyn Reseiden alatyndyqtan, Saratov jáne Orynbor oblystaryndaǵy áriptestermen sý tasqynyn qaýipsiz ótkizý, Varfolomeev jáne Irikla sý qoimalaryn tiimdi paidalaný baǵytynda turaqty bailanys jolǵa qoiylǵan.
Samara qalasyndaǵy Privolje gidrometeorologiia jáne qorshaǵan ortaǵa monitoring júrgizý basqarmasynyń derekterine qaraǵanda, Jaiyq ózenindegi sý deńgeii (Oral qalasy men Kóshim aýyly tusynda) 400-500 santimetrge (qaýipti deńgei - 850 sm) kóteriledi dep boljanýda. Sý tasqyny 4-10 sáýir aralyǵynda bolmaqshy.
Qaraózen men Saryózende kóktemgi sý tasqyny qalyptaǵydan joǵary, biraq qaýip tóndirmeidi dep boljanýda.
Oblys aýmaǵynda barlyǵy 58 gidrotehnikalyq qurylym bolsa, sonyń 24-i respýblikalyq menshikke jatady. Respýblikalyq qurylymdardaǵy ortasha sý tolý kórsetkishi - 42 paiyz. Barlyǵy 7 gidrotehnikalyq qurylym jóndeýdi qajet etedi.
Biylǵy 25 aqpannan bastap ózenderde muz kesý jumystary júrgizildi. Mysaly, Derkól jáne Shaǵan ózenderinde 28420 oiyq oiylyp, 215,2 myń tekshe metr muz kesildi.
Muz kesý jumystary ekologiia jaǵynan da tiimdi, iaǵni qorshaǵan ortaǵa ziianyn tigizbeidi.
«Sý tasqyny bola qalǵan jaǵdaida 2443 adam, 707 tehnika, 51 júzý quraly, 266 motopompa ázir. Sondai-aq 156 tonna janar-jaǵar mai, 125 myń dana qap, 18 myń tonna inertti materialdar bar. Oblystyq biýdjetten aerovizýaldyq tekserýler júrgizýge tikushaq tartý úshin 14,6 mln, ǵaryshtyq monitoring jasaýǵa 6,5 mln teńge qaralǵan. Oblys boiynsha 50, sonyń ishinde Oral qalasynda 28 evakýatsiialyq qosyn belgilendi», dedi Jasulan Jumashev.
