Batys Qazaqstan oblysynda 2020 jyly koronavirýsqa qarsy kúres sharalaryna tartylǵan 15542 meditsina qyzmetkerine 3,6 mlrd teńge ústemeaqy tólendi, dep habarlaidy "Ult aqparat".
«Áleýmettik meditsinalyq saqtandyrý qory» KEAQ BQO boiynsha filialynyń direktory Nurjamal Jumaǵulovanyń óńirlik kommýnikatsiialar qyzmeti alańynda ótken brifingide málim etkenindei, kovidten emdeý úshin ambýlatoriialyq-dárilik qamtamasyz etýge 5 preparat engizildi.
Atalǵan dári-dármekpen ótken jyly 47,7 mln teńgege 19768 patsient qamtyldy.
Nurjamal Shamǵonqyzynyń sózine qaraǵanda, koronavirýsqa shaldyqqan 17328 naýqas 2,1 mlrd teńgege em aldy.
Barlyǵy 50087 PTR-diagnostikaǵa 489 mln teńge tólendi. 19054 mobildi brigadanyń shyqqany úshin 116 mln teńge jumsaldy.
Barlyq qarjy negizinen indetpen kúreske baǵyttalǵanymen, meditsinalyq qyzmet kórsetý, ońaltý jumystary da jalǵasyn tapty.
Mysaly, 2965 emdelýshi mindetti áleýmettik meditsinalyq saqtandyrý aiasynda táýlik boiy statsionarlarda 608,9 mln teńgeniń meditsinalyq ońaltý qyzmetin aldy.
Josparly túrde statsionarlarda 70631 patsient 7,49 mlrd teńgege emdeldi, 11,8 myń adam bosansa (1,22 mlrd teńge), 3,4 mlrd teńgege 15,4 myń ota jasaldy.
«Mindetti áleýmettik meditsinalyq saqtandyrý júiesin iske qosýdaǵy ózekti máseleniń biri – azamattardy saqtandyrý. «Saqtandyrý» bazasynyń derekteri boiynsha biylǵy 1 naýryzda oblysta saqtandyrylǵan halyqtyń sany 84,2 paiyz bolsa, saqtandyrylmaǵandardyń úles sany 15,8 paiyz nemese 108491 adamdy qurap otyr. Ótken jyldyń shilde aiynda saqtandyrylmaǵandardyń úles sany 22,4 paiyz bolǵan edi. Bul jergilikti atqarýshy organdarmen birlese júrgizilip jatqan jumystardyń oń nátije berip otyrǵanyn kórsetedi», dedi N.Jumaǵulova.
Eske sala keteiik, budan buryn BQO-da naýryzda koronavirýsqa qarsy 1200-den astam adamnyń egilgenin jazǵan bolatynbyz.
