Batys Qazaqstan oblysynyń ákimi belgilegen joǵary bilim berý grantynyń biylǵy iegerleri belgili boldy, dep habarlaidy "Ult aqparat".
Oblys ákimdigi janyndaǵy joǵary jáne joǵary oqý ornynan keiingi bilimi bar mamandardy daiarlaýǵa memlekettik bilim berý tapsyrysyn ornalastyrý jónindegi konkýrstyq komissiianyń sheshimimen biyl 50 jas grant iegeri atandy.
BQO Bilim basqarmasynan málim etkendei, 50 jastyń 37-si M.Ospanov atyndaǵy Batys Qazaqstan memlekettik meditsinalyq ýniversitetine tústi.
Dárigerlik mamandyqtarǵa basymdyq berilýi túsinikti. Álemdi jailaǵan indet kezinde Batys Qazaqstan oblysynda da meditsina mamandarynyń jetispeýshiligi baiqalyp otyr.
Sonymen qatar 9 jas M.Ótemisov atyndaǵy Batys Qazaqstan ýniversitetinde, 4-eýi «Nur-Múbarak» Egipet islam mádenieti ýniversitetinde bilim alatyn bolady.
Basqarma basshysy Aigúl Myńbaevanyń aitýynsha, jergilikti biýdjet esebinen bilim berý granty 2017 jyldan beri berilip keledi.
Mundaǵy maqsat – oblysqa asa qajet mamandardy daiarlaý. Bul jobanyń óz jemisin beretini anyq. Biyldyń ózinde bir stýdent M.Ótemisov atyndaǵy Batys Qazaqstan ýniversitetin támamdap, oblystyq dene shynyqtyrý jáne sport basqarmasynyń qaramaǵyndaǵy mekemege jumysqa ornalasty. Aldaǵy jyly bitiretinder de barshylyq, osylai jalǵasa beredi.
Stýdentterge stipendiia tólenedi. JOO bitirgennen keiin úshjaqty kelisimge sáikes jas mamandar aýyldyq jerge jumysqa jiberiledi.
Biyl grant iegerleri atanǵandardyń biri, daryndy balalarǵa arnalǵan mamandandyrylǵan S. Seifýllin atyndaǵy №11 oblystyq qazaq mektep-internat kesheniniń túlegi Janerke Amangeldieva óziniń qýanyshty ekendigin, jergilikti biýdjet esebinen M.Ospanov atyndaǵy Batys Qazaqstan memlekettik meditsinalyq ýniversitetinde oqitynyn jetkizdi.
«Bastapqyda-aq dáriger bolýdy júregimmen qaladym. Degenmen mundai qurmetti ári óte jaýapty mamandyqty tańdaýǵa júreksinip júrdim. Biraq osydan birneshe jyl buryn ájemiz qatty syrqattanyp qalǵan kezde ákemniń «Tórt qyzym da dáriger bolady» degen sózi qanat bitirip, armanymdy bekite tústi. Sol sátten bastap bul maqsatymnan bas tartqan emespin. Armanym – eń birinshi adamdarǵa kómektesetin izgi nietti dáriger bolý. Ekinshiden, ólkemizge tanymal Serik Qýandyquly Aqsholaqov tárizdi talai jannyń ómirine arasha túse alatyn bilikti neirohirýrg atanǵym keledi», - dedi QazAqparat tilshisine Janerke Imantaiqyzy.
