Jylytý maýsymyna orai Batys Qazaqstan oblysynyń turǵyndary men áleýmettik nysandary otymen tolyq qamtamasyz etildi. Bul týraly búgin Úkimet otyrysynda Batys Qazaqstan oblysynyń ákimi Ǵali Esqaliev aitty, dep habarlaidy "Ult aqparat".
«Indýstriia ministrliginde kórsetilgen málimet ótken aptanyń basynda bolǵan jaǵdaiǵa sáikes berilgen. Qazirgi tańda jaǵdai ózgerdi. Sońǵy aptada jumysty jandandyryp, kelesi nátijelerge qol jetkizdik. Biz qazandyqtardy, elektr qosalqy stansalardy jáne sý qubyrlaryn kúrdeli jóndeý boiynsha josparly jumystardy ótkizdik. Avtonomdy qazandyqtardyń daiyndyǵy 95,7 paiyzdy quraidy. Sýmen qamtý jáne sý burý jelileri 95 paiyzǵa, jylytý jelileri 100 paiyzǵa daiyn. Qazirgi tańda densaýlyq saqtaý salasynyń nysandary jylytý maýsymyna 100, bilim berý nysandary 95,2 paiyz daiyn boldy», - dedi ol.
Óńir basshysynyń aitýynsha, birqatar áleýmettik nysan 25 qyrkúiekte jylytý júiesine qosyldy. Búginde kóppáterli turǵyn úilerdiń 95 paiyzy gidravlikalyq synaqtan ótti. Kóppáterli turǵyn úiler jáne áleýmettik nysandar 5 qazanǵa 100 paiyz daiyn bolady.
«Turǵyndar jáne áleýmettik nysandar otynmen tolyq qamtyldy. Aýa raiynyń boljamyna sáikes, aldaǵy 10 kúnde ortasha aýa temperatýrasy +10 gradýstan joǵary bolady. Oblys aýdandary men Oral qalasynda elektrmen jabdyqtaýdyń avtonomdy rezervtik kózderin daiyndaý qamtamasyz etildi. Táýlik boiy jumys isteitin 72 apattyq brigada quryldy. Kommýnaldyq keshen nysandarynda materialdyq-tehnikalyq resrýstardyń azaimaityn rezervi jinaqtaldy. Aldaǵy jylytý maýsymyna daiyndyq turaqty baqylaýda», - dedi Ǵani Esqaliev.
