Foto: gov.kz
BQO ákimi Nariman Tóreǵaliev Astanadan aýysyp kelgen orynbasaryn qyzmetinen bosatty, dep habarlaidy "Ult aqparat".
«Batys Qazaqstan oblysy ákiminiń ókimimen oblys ákiminiń birinshi orynbasary E. Baltaev Qazaqstan Respýblikasynyń zańdarynda belgilengen mindetter men shekteýlerdi saqtamaǵany úshin jumystan bosatyldy», - delingen óńir basshysy baspasóz qyzmetiniń resmi habarlamasynda.
Baltaev óz qyzmetine biyl qańtar aiynda kirisken bolatyn. Ol qurylys, turǵyn úi – kommýnaldyq sharýashylyq, ónerkásip, avtomobil joldary jáne kólik infraqurylymy máselelerimen ainalysqan.
Aita keteiik, Erjan Talǵatuly Baltaev 1983 jyly dúniege kelgen.
Qazaqstan-Britan tehnikalyq ýniversitetin, Qazaq gýmanitarlyq zań ýniversitetin quqyqtaný, Ulybritaniianyń Aberdin ýniversitetin ákimshilik iskerlik mamandyǵy boiynsha bitirgen.
Eńbek jolyn 2004 jyly Astana qalasy boiynsha jyljymaityn múlik jónindegi ortalyqtyń mamany bolyp bastaǵan.
Ár jyldary «CAPS Distribution» kompaniiasynda zańger, TAIB Qazaq bankinde zańger, departament direktory, BUU-nyń Damý baǵdarlamasy jobalarynda ulttyq menedjer, baǵdarlamalardyń úilestirýshisi, «Oral» áleýmettik-kásipkerlik korporatsiiasynda basqarma tóraǵasy, Ádilet ministrligi Memlekettiń múliktik quqyqtaryn qorǵaý departamenti basqarmasynyń basshysy, «QPO B.V.» kompaniiasynda joba basqarýshysy, «TENDEU» Halyqaralyq arbitraj agenttiginiń direktory, «Astana Invest» qalalyq investitsiialardy damytý ortalyǵynyń basqarma tóraǵasy qyzmetterin atqarǵan.
Al Batys Qazaqstan oblysy ákiminiń birinshi orynbasary qyzmetine deiin Astana qalasy investitsiialar jáne kásipkerlikti damytý basqarmasynyń basshysy boldy.
Eske salaiyq, 24 shildede áleýmettik jelide Baltaevtyń ustalǵany týraly aqparat taraǵan. Biraq Sybailas jemqorlyqqa qarsy is-qimyl agenttigi ol málimette joqqa shyǵardy.
