QR Premer-Ministri Asqar Maminniń tóraǵalyǵymen ótken Úkimet otyrysynda «Biznestiń jol kartasy – 2020» memlekettik baǵdarlamasyn iske asyrý barysy jáne biznesti qoldaýdyń 2025 jylǵa deiingi jańa tásilderi qaraldy, dep habarlaidy "Ult aqparat" primeminister.kz saityna silteme jasap.
Atalǵan baǵytta atqarylyp jatqan jumystar jáne baǵdarlamanyń aldaǵy bes jyldyq kezeńge arnalǵan jobasy týraly QR ulttyq ekonomika ministri R. Dálenov, biznes júrgizý negizderine oqytý jáne kásipkerlerge aqyl-keńes berý týraly «Atameken» UKP basqarma tóraǵasy A. Myrzahmetov baiandady.
«Elbasy N. Nazarbaevtyń aitýynsha, myqty biznes – ekonomikanyń turaqtylyǵyn qamtamasyz etýdiń mańyzdy faktorlarynyń biri. Osy jyldyń mamyr aiynda Memleket basshysy Q. Toqaev Ulttyq investorlar keńesiniń otyrysynda ShOB-tyń rólin kúsheitý jáne onyń el ekonomikasyndaǵy úlesin 2025 jylǵa qarai kem degende 35%-ǵa jetkizý mindetin qoidy. 2050 jyly biz 50% kórsetkishke jetýimiz kerek. Atalǵan kórsetkishterge qol jetkizý úshin aýqymdy jumystar júrgizilip jatyr, sonyń ishinde zańnamaǵa ózgerister engizilýde», — dedi A. Mamin.
Úkimet basshysy «Biznestiń jol kartasy – 2020» memlekettik baǵdarlamasy óziniń tiimdiligin dáleldegenin atap ótti. 2010 jyldan bastap ony iske asyrýdyń nátijesinde 342 myńnan astam jumys orny saqtalyp, 94 myńnan astam jańa jumys orny quryldy. Shaǵyn jáne orta biznestiń elimizdiń JIÓ-degi úlesi 2015 jylǵy 24,9%-dan 2018 jyly 28,4%-ǵa deiin ósti. ShOB ónimderiniń kólemi 10 trln teńgege 13,3-ten 23,4 trln teńgege deiin ósti. Sýbektilerdiń sany 300 myńnan astamǵa 900 myńnan 1,3 mln-ǵa deiin ósti. Biyl Qazaqstan Dúniejúzilik banktiń «Doing Business» biznes júrgizý jeńildigi reitinginde 28 orynnan 25 orynǵa kóterildi.
2015 jyldan bastap Memlekettik baǵdarlamany júzege asyrýǵa 282 mlrd teńge bólindi, jańa «Biznestiń jol kartasy – 2025» baǵdarlamasy aiasynda bir jarym ese kóp qarajat – 421 mlrd tg qarastyrylǵan.
Aldaǵy bes jyldyq kezeńde biznestiń yńǵailaspa mindettemelerin engizý kózdelgen (jumys oryndaryn saqtaý/ulǵaitý, tólenetin salyqtar men baǵdarlamaǵa qatysýshylardyń kiristeriniń ósýi), franshizalardy satyp alýǵa jáne qaita qarjylandyrýǵa nesie berý maqsattaryn keńeitý kózdelgen. Memlekettik granttyń mólsheri 3 mln-nan 5 mln teńgege deiin, ainalym qarajattaryn nesielendirý 60-tan 180/360 mln teńgege deiin ulǵaitylady. Baǵdarlamaǵa ekinshi deńgeili banktermen qatar, Mikroqarjy uiymdary da qatysýshy retinde qosylady.
Premer-Ministr Ulttyq ekonomika ministrligine osy jyldyń qarasha aiynyń sońyna deiin «Biznestiń jol kartasy – 2025» baǵdarlamasynyń qabyldanýyn qamtamasyz etýdi, 2019 jyldyń sońyna deiin qajetti normativtik quqyqtyq aktilerdiń qabyldanýyn qamtamasyz etýdi, «Atameken» UKP jáne «Damý» AQ-men birlesip, kásipkerler arasynda jańa Baǵdarlamanyń tásilderi men múmkindikteri týraly aqparattyq-túsindirý jumystaryn júrgizýdi tapsyrdy.
