QR bilim jáne ǵylym ministri Kúlásh Shámshidinova Shyǵys Qazaqstan oblysyna jumys sapary barysynda Shákárim atyndaǵy úsh tilde oqytatyn №5 kópbeiindi gimnaziiasyna, Semei qalasyndaǵy №49 orta mektepke, sondai-aq, atalmysh mektep ishinen ashylǵan «Pedogogikalyq - psihologiialyq túzetý» kabinetinde boldy, dep habarlaidy QazAqparat Semei qalalyq bilim bólimine silteme jasap.
Kezdesý barysynda ministr Shákárim atyndaǵy úsh tilde oqytatyn №5 kópbeiindi gimnaziiasynynyń kópjyldyq tarihyna qaramastan, jańa zaman talabyna sai ekenin atap ótti. Mektep NZM standarttaryna sai jańa tehnologiialarmen jabdyqtalǵan.
Sondai-aq, Kúlásh Shámshidinova «Dara» qorynyń kómegimen ashylǵan, búgingi kúni 400-den astam balany qamtyp otyrǵan «Pedogogikalyq - psihologiialyq túzetý» kabinetine bardy. Munda ár balaǵa tiisti jaǵdai jasalǵan. Ministr mektep ishinen ashylǵan kabinet jaily:
«Korektsiialyq kabinet jaiynda birneshe ret estigenmin, búgin oiymdaǵyny kórgendei boldym. Bul - erekshe balalardy áleýmettik beiimdeý, ońaltý jáne erekshe kútimdi qajet etetin balalardyń ata-anasyna keńes berý, kómektesý qyzmetin kórsetetin birden-bir oryn», - dedi.
Kúlásh Noǵataiqyzy pedogogikalyq ujymmen kezdesip, ustazdardy tolǵandyryp júrgen suraqtarǵa jaýap berdi. Ministrge kitaphanashylar men ádiskerlerdiń eńbekaqysy, kriterialdy baǵalaý, bilim berýde shet tilderdiń engizilý júiesi týraly suraqtar qoiyldy.
Ult kóshbasshysynyń jalaqysy tómen jumysshylardyń eńbekaqysyn kóterý bastamasy muǵalimderge de qatysty.
«Eń birinshi kezektegi másele - tabysy tómen jumysshylardyń eńbekaqysyn 30%-ǵa kóterý. Qazir QR Eńbek jáne halyqty áleýmettik qorǵaý ministrliginde esep júrgizilip jatyr. Daiyn bolǵanda habarlaimyz», - dedi ministr.
Ministr óz sózinde mektepterdiń jańa baǵdarlamaǵa kóshý sebepterine basa nazar aýdardy.
«Budan ary da ózgerister bolady, jumys jasalady. Sebebi, biz aldymyzda otyrǵan oqýshylardyń, olardyń ata-anasy men memleket aldynda jaýaptymyz. Búginde zaman talabyna sai eńbek narqy ózgerip jatyr. Sondyqtan básekege qabiletti tulǵa tárbieleý óte mańyzdy. Balalarǵa oilanýdy, oiyn jetkizýdi úiretýimiz kerek», - dedi Kúlásh Shámshidinova.
