Sýǵa shomylý maýsymy bastalǵaly beri elimizdiń sý aidyndarynda 266 adam sýǵa ketti, onyń ishinde 87 bala bar, dep habarlaidy "Ult aqparat".
QR IIM Tótenshe jaǵdailar komitetiniń dereginshe, 242 adam, onyń ishinde 80 bala shomylýǵa jabdyqtalmaǵan jerlerde sýǵa túsip batyp ketken. Eresekterdiń qaraýynsyz qalǵan 24 balanyń da ajaly sýdan boldy. Sondai-aq mas kúiinde sýǵa shomylǵan 23 adam mert boldy. Sýǵa shomylý maýsymy bastalǵannan beri jedel-qutqarý jasaǵynyń qutqarýshylary 269 adamdy, onyń ishinde 85 balany qutqardy.
Elimizde resmi sýǵa túsý jáne sý janynda demalýǵa arnalǵan 607 oryn (107 kommýnaldyq jáne 500 jeke jaǵajai) belgilengen. 27 kommýnaldyq jaǵajaidyń akvatoriialary IIM TJK bólimsheleriniń baqylaýynda boldy. Sondai-aq 53 mobildik qutqarý beketterin qoiý arqyly sý aidyndarynyń 113 qaýipti ýchaskesi (tabiǵi jaǵajailar) baqylaýǵa alynǵan. Jeke jaǵajailarda kezekshilik etý úshin TJK bólimshelerinde arnaiy daiarlyqtan ótken qoǵamdyq qutqarýshy-jasaqshylardyń kúshimen 310 nysandyq qutqarý beketi qurylǵan.
Shomylýǵa tyiym salynǵan 3 myńnan astam oryn anyqtaldy. Atalǵan jerlerge 3 386 eskertý belgisi men 1 120 kórneki stend ornatylyp, onda adamdardyń qaza bolý sebepteri men oqiǵaǵa yqpal etken jaǵdailar kórsetilgen.
1 mamyr men 1 qyrkúiek aralyǵynda 14 myńnan astam reid júrgizildi. 2 myńnan astam adam ákimshilik jaýapkershilikke tartylyp, 12 mln teńgeden astam aiyppul salynǵan.
