Biyldan bastap birinshi synyp oqýshylary bir tilde ǵana bilim alady. Bul týraly Oqý-aǵartý ministri Ashat Aimaǵambetov Túrkistan oblysynyń turǵyndarymen kezdesýinde aitty, dep habarlaidy QazAqparat.
Ministr 1 qyrkúiekten bastap bilim salasyna engizetiletin jańalyqtardy atap ótti. Iaǵni, biylǵy oqý jylynan bastap qazaq mektebiniń birinshi synybyna barǵan balalar tek qazaq tilinde bilim alady.
«Munyń aldynda birinshi synypqa barǵan bala aǵylshyn tiliniń, orys tiliniń, qazaq tiliniń álippesin oqý kerek boldy. Bul 6 jastaǵy bala úshin qiyn. Balany damytý úshin ana tilin úiretip alǵan óte mańyzdy. Biz sol sheshimdi qabyldadyq. Biyldan bastap qazaq tildi mektepke barǵan balalar tek qaza tilinde jazyp, úirenetin bolady» - dedi Aimaǵambetov.
Sondai-aq, ministr pedagogtardyń mártebesin kóterý baǵytynda atqarylyp jatqan jumystardyń nátije bere bastaǵanyn jetkizdi.
«Muǵalimderdi ózderine tán emes jumystardan bosattyq. Jalaqysy ósti. Qazir bul másele negizinde sheshildi. Sonyń ishinde ártúrli qujat, ártúrli esep tapsyrý boiynsha úlken problema boldy. Jalpy men qol qoiǵan buiryq boiynsha pedagog birinshiden kúndelikti elektrondy jýrnalǵa baǵa qoiady. Ekinshisi kúndelikti oqý josparyn daiyndaidy. Bitti, basqa eshteńe bolmaýy kerek. Kimde-kim osy buiryqty buzatyn bolsa, onda biz olardy qatań jaýapkershilikke tartamyz. Aldyńǵy jyly osy baǵytta 700-ge jýyq adam túrli jaýapkershilikke tartyldy», - dedi ol.
