Biyl 10,7 myńnan astam etnikalyq qazaq Qazaqstan Respýblikasynyń azamattyǵyn qabyldady, dep habarlaidy "Ult aqparat" Eńbek jáne halyqty áleýmettik qorǵaý ministrligine silteme jasap.
«Jyl basynan beri kórshi elderden tarihi otanyna oralǵan 10,7 myńnan astam etnikalyq qazaq Qazaqstan azamattyǵyn aldy. Jańa azamattardyń kópshiligi bizdiń respýblikamyzǵa Ózbekstannan kelgen - 48,5%. Sonymen qatar QHR – 36%, Mońǵoliia – 6,2%, Túrikmenstan – 5,4%, Resei Federatsiiasy – 1,1%, Iran – 0,5% jáne basqa elderden kelgen», delingen habarlamada.
Elimizge kelgender negizinen Aqmola (27%), Mańǵystaý (14%) jáne Jambyl (9%) oblystarynda, sondai-aq Nur-Sultan (8,9%) jáne Shymkent (8,5%) qalalarynda qonystandy.
Aita keterligi, búgingi kúni (1991 jyldan bastap) 307,3 myń otbasy nemese 1,046 million etnikalyq qazaq tarihi otanyna oralyp, oralman mártebesin aldy.
«Qazaqstanda oralman mártebesin alǵan etnikalyq qazaqtarǵa jeńildetilgen túrde azamattyq alý úshin qolaily jaǵdailar jasaldy. Bul mártebe bir jylǵa jaramdy. Mártebeni uzartý oralman mártebesi toqtatylǵan kúnnen bastap úsh aidan aspaityn merzimge ótinish bergen kezde jeńildetilgen tártippen azamattyq alý úshin ǵana kózdeledi», – dedi QR Eńbek jáne halyqty áleýmettik qorǵaý vitse-ministri Ahmadi Sarbasov.
Bul rette, ol keibir oralmandardyń usynylǵan ýaqyt ishinde jeńildetilgen tártippen Qazaqstan azamattyǵyn almaǵan jáne mundai múmkindikten aiyrylǵanyn atap ótti.
«Osyǵan bailanysty Qazaqstannyń Tuńǵysh Prezidenti – Elbasy Nursultan Nazarbaev mundai oralmandarǵa mártebesin jeńildetilgen tártippen alýdy 2019 jyldyń 31 jeltoqsanyna deiin uzartý týraly sheshim qabyldady. Osylaisha, mártebesin uzartpaǵan oralmandar ony isteý úshin jergilikti atqarýshy organdarǵa júgine alady jáne Qazaqstan azamattyǵyn jeńildetilgen tártippen alý úshin ishki ister organdaryna qujattardy tapsyra alady», - dedi Ahmadi Sarbasov.
26 tamyzdaǵy jaǵdai boiynsha aktsiia sheńberinde el boiynsha oralman mártebesi 5 789 adamda uzartyldy, onyń 4 909-y Qazaqstan azamattyǵyn alýǵa qujattaryn tapsyrdy.
