Biyl QR Prezidenti Qasym-Jomart Toqaevtyń qatysýymen 463 shara ótti. Bul týraly búgin Aqordada ótken brifingte QR Prezidentiniń baspasóz hatshysy Berik Ýáli aitty, dep habarlaidy QazAqparat.
«El jylnamasyndaǵy biylǵy jyl úlken iri oqiǵalarmen este qaldy. Bul eń aldymen egemen elimizdiń qalyptasyp, damýyna zor eńbek sińirgen QR Tuńǵysh Prezidenti - Elbasy Nursultan Nazarbaevtyń el basqarý tizginin Qasym-Jomart Toqaevqa tapsyrǵan sátinen bastaý alady. Osydan keiingi elimizdiń saiasi ómirindegi mańyzy zor oqiǵa Prezident sailaýy boldy. Biliktiń basty sailaý naýqany Ata zańymyzǵa sáikes júzege asty. Qasym-Jomart Kemeluly halyq aldynda ant bergennen keiin Memleket basshysy retinde birden bilek sybana kirisip ketti», - dedi ol
Onyń atap ótýinshe, Memleket basshysy elimizdiń búkil óńirin aralap, halqymyzdyń áleýmettik-ekonomikalyq ahýalymen tanysqan. Sonymen qatar basqa da kóptegen mańyzdy bastamalar qolǵa alynyp, aýqymdy is-sharalar atqaryldy.
«Jalpy, Memleket basshysynyń naýryz aiynan bergi atqarǵan jumysy halyqtyń kóz aldynda. Prezident kóptegen halyqaralyq kezdesýler ótkizdi. Óńirlerdi aralady. Shetelderge resmi, memlekettik saparlarmen baryp qaitty jáne birqatar halyqaralyq jiyndarǵa qatysý úshin shetelderde jumys saparymen boldy. Mańyzdy kelisimder júrgizdi», - dedi Berik Ýáli.
Sonymen qatar ol QR Prezidentiniń el ishinde atqarǵan jumysyna toqtaldy.
«El ishindegi atqarǵan sharýalaryna toqtalar bolsaq, Memleket basshysynyń qatysýymen 463 shara ótti. Qasym-Jomart Kemeluly elimizdiń aimaqtaryna 25 ret jumys saparymen bardy. Keibir oblystarǵa tipti eki ret barǵanyn bilesizder. Qasym-Joart Kemeluly QR Prezidenti qyzmetine kirisken sátten beri 239 memlekettik organnyń basshylaryn, Parlament depýtattaryn, saiasi partiialar men qaýymdastyq ókilderin jáne jeke tulǵalardy qabyldady. Sonymen qatar Memleket basshysy 31 eldiń basshysymen telefon arqyly sóilesti», - dedi QR Prezidentiniń baspasóz hatshysy.
