Soltústik Qazaqstan oblysyna byltyr elimizdiń eńbek kúshi artyq óńirlerinen 1 800-ge jýyq adam qonys aýdarsa, sonyń 96% jumyspen qamtyldy, dep habarlaidy "Ult aqparat".
SQO jumyspen qamtýdy úilestirý jáne áleýmettik baǵdarlamalar basqarmasy ótken jyldy qorytyndylady.
Basqarma basshysy Almaz Qoshmanovtyń aitýynsha, byltyr óńirde 30 myńǵa jýyq adam jumysqa ornalasqan. Onyń 13 myńy jańadan ashylǵan.
«Byltyr óńirde «Eńbek» memlekettik baǵdarlamasyna oblystyń shamamen 24 myń turǵyny qatysty. 542 jumyssyz adam eńbek naryǵynda suranysqa ie mamandyqtarǵa qaita oqytyldy. 938 adam «Bastaý biznes» kýrsyna qatysyp, kásipkerlik negizderimen tanysty. Óz isin ashýǵa niet etkenderge 3 mlrd 671 mln teńgege 2 295 nesie men grant berildi», - deidi Almaz Qoshmanov.
2021 jyly QR Premer-Ministri men oblys ákimi arasynda jasalǵan memorandým aiasynda SQO-da 26 myń adamdy jumysqa ornalastyrý jáne 12 myń jańa turaqty jumys ornyn qurý josparlanǵan.
Óńirdegi mamandarǵa degen qajettiliktiń ornyn toltyrý maqsatynda biyl da oblysta elimizdiń eńbek kúshi artyq óńirlerinen azamattardy qabyldaý jumystary jalǵasady.
Byltyr SQO negizinen ońtústik óńirlerden 590 otbasy, iaǵni 1765 adamdy qabyldady.
Onyń basym bóligi jumys kúshine aitarlyqtai suranys bar aýyldyq jerge kóshirildi.
Eńbekke qabiletti azamattardyń shamamen 96 %-y jumyspen qamtylǵan. Biyl oblys shamamen 2,5 myń adamdy qabyldaýdy josparlap otyr.
«Az qamtylǵan otbasylar da únemi nazarda. Byltyr 2485 otbasyna, onyń ishinde 6743 balaǵa ataýly áleýmettik kómek kórsetildi. 1-6 jasqa deiingi balalarǵa kepildik berilgen áleýmettik toptama ótken jyldyń qorytyndysy boiynsha 2552 búldirshinge berildi. Biyl ataýly áleýmettik kómekpen 8 300 adamdy nemese 1851 az qamtylǵan otbasyny, kepildi áleýmettik paketpen 2233 balany qamtý josparlanǵan», - deidi basqarma basshysy.
Qazirgi ýaqytta oblysta 26 myńnan astam múgedek adam esepte tur.
2021 jyldan bastap qyzmetter men quraldarmen qamtamasyz etý áleýmettik qyzmetter portaly arqyly ǵana júrgiziledi, ol arqyly 8 myńnan astam tapsyrysty qamtý josparlanyp otyr.
«Tótenshe jaǵdai jáne karantin kúsheitilgen kezde ýaqytsha jumyssyz qalǵan azamattarǵa 42 500 teńgeden 158 myń tólem jasaldy. Azyq-túlik-turmystyq jiyntyǵyn satyp alý úshin 35 125 adamǵa 2 AEK mólsherinde tólem júrgizildi. «Biz birgemiz» naýqany aiasynda 23 761 adam 50 myń teńge kóleminde materialdyq kómek aldy», - deidi SQO jumyspen qamtýdy úilestirý jáne áleýmettik baǵdarlamalar basqarmasynyń basshysy Almaz Qoshmanov.
