Ulttyq joba aiasynda otandyq energetika jáne munai-gaz-himiia salasyna úlken mán berilgen. Sonymen qatar atalǵan sala ekonomikany jańǵyrtýdyń mańyzdy baǵyttarynyń biri. Bul týraly QR Premer-Ministri Asqar Mamin málim etti, dep habarlaidy QazAqparat.
«Qazaqstandyqtardyń ál-aýqatyn arttyrýǵa baǵyttalǵan ornyqty ekonomikalyq ósý» ulttyq jobasy aiasynda energetika jáne munai-gaz-himiia salalaryna úlken mán berilgen. Osy jyldyń qorytyndysy boiynsha elde munai óndirý kólemi 85,7 mln tonnany quraidy. Salany odan ári damytý úshin qazirgi kezde Teńiz, Qashaǵan jáne Qarashyǵanaq ken oryndarynda aýqymdy jobalar iske asyrylyp jatyr. Aldaǵy ýaqytta Qalamqas teńiz jáne Hazar teńiz jobalaryn igerý josparlanǵan. Bul jobalardyń jalpy quny 51 mlrd dollardan asady», - dedi Asqar Mamin Úkimet otyrysynda.
Sondai-aq, Úkimet basshysy eldi gazdandyrý boiynsha jumystyń qarqyndy júrip jatqanyn aitty.
«Biyl shamamen 52 mlrd teńgege 140-tan astam joba iske asyryldy, 1,8 myń shaqyrymǵa jýyq gaz jelisi tartyldy. Osyǵan orai qazirgi ýaqytta halyqtyń gazben qamtamasyz etilýi 10 mln adamnan asady. Bul jumys jalǵasady. Munai-gaz óndirisin damytý ekonomikany jańǵyrtýdyń mańyzdy baǵyttarynyń biri. 2021 jyldyń qorytyndysy boiynsha munai-gaz himiiasy ónimin óndirý kólemi 190 myń tonnany quraidy», - deidi ol.
