Biyl áleýmettik-eńbek salasyndaǵy avtomattandyrylǵan qyzmetter úlesi 93 paiyzǵa jetkiziledi. Bul týraly QR Eńbek jáne halyqty áleýmettik qorǵaý vitse-ministri Erbol Ospanov aitty, dep habarlaidy QazAqparat.
Vitse-ministrdiń aitýynsha, búgingi tańda áleýmettik-eńbek salasynda 44 memlekettik qyzmet túri kórsetý qarastyrylǵan. Onyń ishinde 40 qyzmet nemese 91 paiyzy elektrondy, 18-i proaktivti túrde kórsetildi.
«2020 jyldyń qorytyndysy boiynsha áleýmettik-eńbek salasynda azamattarǵa 12,4 mln memlekettik qyzmet, onyń ishinde 7,8 mln-y elektrondy túrde kórsetildi. Biyl avtomattandyrylǵan qyzmetterdiń úlesin 93 paiyzǵa deiin jetkizý josparlanýda. Memleket basshysy 2020 jylǵy 1 qyrkúiektegi Qazaqstan halqyna Joldaýynda zeinetaqy men járdemaqy taǵaiyndaý men tóleýge bailanysty protsesterdi tsifrlandyrý boiynsha tapsyrma bergen bolatyn. Bul tapsyrma aiasynda múddeli memlekettik organdarmen birlesip, áleýmettik salanyń barlyq qyzmetterine, sonyń ishinde karantin jáne shekteý sharalary kezeńinde elektrondy nemese proaktivti formatta kórsetilgen qyzmetterge taldaý jasaldy», – dedi Ospanov.
Onyń atap ótýinshe, taldaý nátijesinde belgili bir tejeýshi faktorlar anyqtaldy.
«Mysaly, eń qajetti qyzmetterdiń biri – bala týý boiynsha járdemaqy taǵaiyndaýdy alaiyq. 2020 jyly 425 587 myńǵa jýyq bala dúniege keldi. Onyń ishinde 58 298-i ata-ana járdemaqyny proaktivti túrde aldy. Bul problemanyń bar ekendigin bildiredi. Sondyqtan problemalardy anyqtaý úshin tiisti taldaý júrgizdi. Nátijesinde birqatar tejeýshi faktorlar anyqtaldy. Bul – keibir memlekettik bazalardyń týystyq bailanystar boiynsha málimetterdiń joqtyǵy nemese durys, mobildi azamattar bazasynda telefon nómirin tirkemeý, azamattar tarapynan SMS-habarlamaǵa jaýapty bermeý, banktik shottardyń durys emestigi, mártebesiniń ózgerýi», – dedi vitse-ministr.
