QR Eńbek jáne halyqty áleýmettik qorǵaý vitse-ministri Erjan Birjanov elimizde qandai mamandyqtarǵa suranys artqanyn aitty, dep habarlaidy QazAqparat.
«Búgingi tańda elimizdegi jumyssyzdyq deńgeii 4,9 paiyzdy quraidy. Iaǵni, 449 myń adam jumyssyz retinde tirkeýde tur. Bizde elektrondy eńbek birjasy bar. Soǵan saraptama júrgizip otyramyz. Mamandyqtarǵa suranys ártúrli bolyp keledi. Máselen, osy jyldyń basynda qurylysshylarǵa, qyzmet kórsetý salasy qyzmetkerlerine 65 myń suranys bolsa, qazir egin egý maýsymyna bailanysty aýyl sharýashylyǵy mamandaryna suranys artyp tur. Dárigerlerge, onlain formatta jumys isteitin IT-mamandaryna da suranys basym», - dedi vitse-ministr Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, ministrlik qazirgi ýaqytta jumysshy tapshy mamandyqtarǵa saraptama jasap jatyr. Onyń qorytyndysynda aldaǵy ýaqyttaǵy oqytý kýrstary sol mamandyqtar boiynsha júrgiziledi.
«Qajetti mamandyqtar atlasyn jasadyq. Tek bizde emes, basqa da memleketterde qandai ózgerister bolyp jatqanyn zerdeledik. Óitkeni, eńbek naryǵy jyljymaly bolyp keledi. Otandastarymyz shetelge baryp, sheteldikter bizge kelip jumys istep jatyr. Sondyqtan bolashaqta qandai mamandyqtar bolmaityndyǵyna, qandai mamandyqtar transformatsiiaǵa ushyraityndyǵyna, qandai mamandyqtar suranysta bolatyndyǵyna saraptama jasadyq. Qorytyndysynda 239 jańa mamandyq paida bolyp, 95-i transformatsiiaǵa ushyrady», - dedi Erjan Birjanov.
