Foto: Egemen.kz
Úkimet otyrysynda kólik ministri Nurlan Saýranbaev Memleket basshysynyń temirjol infraqurylymyn damytý jóninde bergen tapsyrmalarynyń júzege asý barysy týraly baiandady, dep habarlaidy Ult.kz.
Ol temirjol jelisiniń jalpy paidalaný uzyndyǵy 16 myń shaqyrym ekenin atap ótti.
Tasymaldardyń tiimdiligi men turaqtylyǵyn arttyrý úshin 2029 jylǵa deiin 5 myń shaqyrym jańa jol qurylysyn salý men jańǵyrtý jumystaryn júrgizý josparlanýda. Sonymen qatar, 11 myń shaqyrym jolǵa jóndeý jumystary júrgizilýde.
Qazirgi kezde 5 joba boiynsha jańadan qurylys jumystary júrip jatyr. Olar – «Dostyq – Moiynty», «Darbaza – Maqtaaral», «Moiynty – Qyzyljar» «Baqty – Aiagóz» ýchaskeleri jáne «Almaty ainalma temirjoly».
Biyl merziminen buryn eki iri joba aiaqtalmaq. Olar «Dostyq – Moiynty» ýchaskesi jáne «Almaty ainalma temirjoly».
Kelesi jyly «Moiynty – Qyzyljar» jáne «Darbaza – Maqtaaral» jańa temirjoldary iske qosylmaq.
Sonymen birge, biyldan bastap 3 myń shaqyrymdyq temirjol ýchaskelerinde keń aýqymdy jańǵyrtýlar bastaldy.
«Bul jumystardy jańa joldardy salýmen birdei dárejede qarastyrýǵa bolady. Mysaly, «Qyzyljar – Sekseýil» ýchaskesiniń ótkizý qabileti 8 poiyzdan 25 poiyzǵa deiin, al «Qandyaǵash – Tobyl» 7-den 25-ke deiin artpaq. Búgingi kúnde atalǵan jobalar Qazaqstannyń temirjol negizin tolyǵymen qalyptastyrady dep aitýǵa bolady», — dedi Nurlan Saýranbaev.
