2020 jyly 1,2 millionnan astam adam jumyspen qamtýǵa járdemdesý sharalarymen qamtylady. Bul týraly QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy "Ult aqparat".
Ortalyq kommýnikatsiialar qyzmetinde onlain rejimde ótken halyqqa esep berý kezdesýi barysynda ministr osy jyldyń I-toqsan qorytyndysynda ekonomikada jumyspen qamtylǵandardyń sany 8,8 mln adamdy, jumyssyzdyq deńgeii 4,8%-dy quraǵanyn atap ótti. Naýryz-sáýir ailarynda karantindik sharalardyń engizilýine bailanysty 4,2 million qazaqstandyq ýaqytsha jumystan bosatyldy.
«Karantindik sharalardy jeńildetý ústimizdegi jyldyń 20 sáýirinde bastaldy. Bul kezeń-kezeńimen jumysqa oralýǵa múmkindik berdi. Úkimet jumyspen qamtýǵa kóńil bólip, ekonomikany qalpyna keltirý boiynsha qabyldap otyrǵan sharalar osy jyldyń shilde aiynan bastap eńbek naryǵyndaǵy jaǵdaidy turaqtandyrady dep esepteimiz», - dedi Birjan Nurymbetov.
Onyń atap ótýinshe, jyl sońynda kútiletin jumyssyzdyq deńgeii 6,1 paiyz bolýy múmkin. Osy oraida, ol osy jyly jumyspen qamtýǵa járdemdesý sharalaryna 1 million 220 myń adamdy tartý josparlanyp otyrǵanyn atap ótti.
«Nátijeli jumyspen qamtýdy jáne jappai kásipkerlikti damytýdyń «Eńbek» memlekettik baǵdarlamasyn iske asyrý aiasynda – 600 myń adam, jumyspen qamtýdyń jol kartasy aiasynda – 255 myń adam, basqa memlekettik baǵdarlamalar boiynsha 364 myń adam jumyspen qamtylady», - dedi Birjan Nurymbetov.
Ministrdiń aitýynsha, 1 maýsymdaǵy jaǵdai boiynsha 224 myńnan astam adam «Eńbek» memlekettik baǵdarlamasyna qatysyp, olardyń 185 myńy jumysqa ornalastyryldy. Memlekettik qoldaý sharalary aiasynda bos jumys oryndaryna 99 myń adam, qoǵamdyq jumystarǵa – 62 myń, áleýmettik jumys oryndaryna – 13 myń, jastar praktikasy boiynsha 11 myń adam jumyspen qamtyldy.
