Biyl elimizde 1,5 myńnan astam jemqorlyq qylmysy tirkelip, 1280 adam áshkerelendi. Bul týraly QR Sybailas jemqorlyqqa qarsy is-qimyl agenttiginiń tóraǵasy Marat Ahmetjanov OKQ-de ótken baspasóz máslihatynda málim etti, dep habarlaidy QazAqparat.
«Biyl 11 aidyń qorytyndysy boiynsha elimizde 1576 sybailas jemqorlyq qylmysy tirkeldi. Eń kóbi 3 megopoliste tirkelip otyr, olar - Almaty, Nur-Sultan jáne Shymkent qalasy. Sondai-aq, Túrkistan, ShQO jáne Jambyl oblystary da bar. Al jemqorlyq jii jasalatyn salalarǵa kelsek, ol aldymen aýyl sharýashylyǵy, bilim, turmystyq-kommýnaldyq sharýashylyq, áleýmettik qamtamasyz etý jáne densaýlyq saqtaý. Sybailas jemqorlyq jasady degen kúdikpen 1280 adam áshkerelendi, onyń 159-y - ártúrli deńgeidegi basshylar», - dedi Marat Ahmetjanov.
Agenttik tóraǵasynyń málimetinshe, biyl bir vitse-ministr, 13 ákim jáne onyń orynbasarlary, 4 sýdia jáne 28 oblystyq basqarma basshysy paraqorlyqpen ustaldy.
«Memleket biýdjetine keltirilgen 20 mlrd teńgeden astam zalal óteldi. Biraq bul qurǵaq sandar shynaiy jaǵdaidy kórsetpeidi. Biyl jemqorlyq isi ótken jylǵa qaraǵanda 34 paiyzǵa azaiyp otyr. Onyń ózindik sebepteri bar. Biz búginde sybailas jemqorlyqpen kúreste úshbýyndy jumys júiesine kóshtik. Qazir sybailas jemqorlyq isi boiynsha kúdiktige qatysty barlyq protsesýaldy sheshimder prokýrordyń kelisiminsiz zańdy kúshine enbeidi. Tergeýdiń alǵashqy kezeńinen bastap, is jabylǵansha birneshe súzgiden ótedi», - deidi ol.
