Biyl «Biologiialyq qaýipsizdik týraly» zań ázirleýimiz kerek. Bul týraly búgin QR Densaýlyq saqtaý ministrliginiń keńeitilgen alqa otyrysynda vedomstvo basshysy Aleksei Tsoi aitty, dep habarlaidy QazAqparat.
«Tótenshe jaǵdai kezinde zamanaýi qorǵanys quraldaryn engizý jáne olardyń terrorizmge qarsy turaqtylyǵyn arttyrý arqyly biologiialyq qorǵaityn júielerdi jetildirý qajet boldy. Osyǵan bailanysty 2021 jyly «Biologiialyq qaýipsizdik týraly» zań ázirleýimiz kerek», - dedi Densaýlyq saqtaý ministri.
Onyń aitýynsha, atalǵan zańdy júzege asyrý aiasynda baqylaý júiesin jetildirý úshin 38 normativtik-quqyqtyq aktige halyqtyń densaýlyq jai-kúiin baǵalaý, saraptama jasaý jáne boljaý júielerin damytý, syn-tegeýirinderge qarsy áreket etý bóliginde túzetýler engiziledi.
«Elimizdiń meditsinalyq joǵary oqý oryndarynda sanitarlyq-gigienalyq beiindegi fakýltetter qaita qalypyna keltirildi. Sanitarlyq-epidemiologiialyq qyzmettiń kadrlyq áleýetin arttyrý úshin qaita daiyndaý jáne biliktilik arttyrý júiesi jetńildiriledi. Qyzmetti tsifrlandyrý 2025 jyly aiaqtalady», - dedi Aleksei Tsoi.
Ministrdiń sózine qaraǵanda, 2022-2024 jyldary aralyǵynda sanitarlyq-epidemiologiialyq qyzmettiń infraqurylymyn jańǵyrtý úshin komitettiń aýdandyq bólimsheleriniń 54 ǵimaraty jóndeledi. Ulttyq saraptama ortalyǵynyń 27 ǵimaratyna jóndeý júrgizilip, 3 zerthananyń jańa ǵimaraty salynady. Komitettiń aýmaqtyq bólimsheleri úshin 64 avtokólik satyp alynady.
