«Baqytty otbasy» baǵdarlamasyna ótinim qabyldaý bastaldy. Biyl bul baǵdarlamaǵa 50 mlrd teńge bólinip otyr, dep habarlaidy QazAqparat.
«Otbasy bank» AQ basqarma tóraiymy Lázzat Ibragimova ortalyq kommýnikatsiialar qyzmetinde ótken baspasóz máslihatynda osyndai málimet aitty.
«Ótken jyl bank úshin rekordtyq jyl bolǵanyn atap ótken jón. Bir jyldyń ishinde 5 myńnan astam qazaqstandyq «Otbasy bank» qoldaýymen baspanaly boldy. Árbir besinshi zaem «Nurly jer» memlekettik baǵdarlamasy boiynsha berildi. 2020 jyly elimizdiń barlyq aimaqtarynyń turǵyndaryna «Nurly jer» baǵdarlamasy aiasynda 10759 páter kilti tabystaldy. Osy jyldyń úsh aiynda 3727 otbasy qonys toiyn toilady», - dedi bank tóraiymy.
Lázzat Ibragimova biyl «Baqytty otbasy» baǵdarlamasy boiynsha neshe páter beriletinin de atady.
«Baqytty otbasy» baǵdarlamasyna kesheden beri bizdiń sait arqyly onlain formatta ótinish qabyldap bastadyq. Biyl oǵan 50 mlrd teńge bólinip otyr. Bizdiń josparly esebimiz boiynsha bul shamamen 5000 otbasy degen sóz. Tek úsh sanatqa ǵana qatysty: kópbalaly otbasylar, múmkindigi shekteýli balalardy tárbielep otyrǵan ojanuialar jáne tolymsyz otbasylar. Dúisenbiden beri úiden shyqpai-aq, onlain formatta ótinim berý múmkindigi ashyldy. Qazirdiń ózinde kezekte turǵan 19833 ótinim baǵdarlama sharttaryna sáikes keledi. Jalpy 23109 ótinim túsken bolatyn, 3276 ótinim qabyldanbady. Onyń ishinde 500 ótinim úsh sanattyń birine de jatpaityn adamdardan túsken. Iaǵni, olar kezekte turǵan joq. 2624 adam memlekettik qyzmetker, biýdjettik sala mamandary, áskeri qyzmetkerler retinde tirkelgen. Sondyqtan bular da atalmysh baǵdarlamaǵa sáikes emes. 123 adam basqa sanat boiynsha kezekte tur. Tipti soǵys ardageri sanatynda turǵan 3 adam ótinim bergen», - dedi bank «Otbasy bankiniń» basshysy.
