Biyl 9 aida jastardyń biznes ideialaryn qoldaý úshin 5587 mikrokredit berildi

Foto: mos.ru

Biyl 9 aida jastardyń biznes ideialaryn qoldaý úshin 5587 mikrokredit berildi. Bul týraly QR Eńbek jáne halyqty áleýmettik qorǵaý vitse-ministri Oljas Ordabaev habarlady.

"Biyl naýryzdan bastap jastardyń biznes ideialaryn qoldaý úshin jeńildikti 2,5%-ben mikrokredit berý bastaldy.

Jasy – 21-den 35 jasqa deiin. Kredittiń mólsheri - 5 mln. teńgege deiin. Kredit berý merzimi – 5 jylǵa deiin (aýyl sharýashylyǵyndaǵy jobalar úshin 7 jylǵa deiin). Kanikýl (jeńildik) kezeńi - kredit berý merziminiń 1/3 bóligine deiin, iaǵni osy kezeńde kreditti tóleý qajet emes!

Eń qolaily kepildik saiasaty – bank depozitteri men arnaiy tehnika da qabyldanady. Qujattar toptamasy óte az.

Baǵdarlama iske asyrylǵan 9 aida 26 mlrd teńge somaǵa 5587 mikrokredit maquldanyp, berildi" - dep jazdy ol Facebook paraqshasynda.

Barlyq qajetti aqparat Agrarlyq nesie korporatsiiasynyń saitynda ornalasqan nemese 5353 bailanys ortalyǵyna habarlasýǵa bolady.