QR Premer-Ministriniń birinshi orynbasary Álihan Smaiylov shaǵyn jáne orta bizneske jeńildik berý jaily depýtattyq saýalǵa jaýap berdi, dep habarlaidy QazAqparat.
«Qarjy naryǵyn retteý jáne damytý agenttiginiń aqparaty boiynsha, biyl Memleket basshysynyń 2021 jylǵy 1 sáýirdegi tapsyrmasyn oryndaý úshin vedomstvo tóraǵasynyń 2021 jylǵy 9 sáýirdegi «Shaǵyn jáne orta biznes sýbektileriniń qaryzdary boiynsha tólemderdi keiinge qaldyrý tártibin bekitý týraly» № 127 buiryǵy qabyldandy», - dep jazdy Álihan Smaiylov depýtattyq saýalǵa bergen jaýabynda.
Bul jerde áńgime ShOB nysandaryna 2021 jylǵy 1 sáýirge deiin, jeke kásipkerlerge 2021 jylǵy 1 sáýir men 30 maýsym aralyǵynda berilgen kreditter týraly bolyp otyr.
«Keiinge qaldyrý merzimi ShOB sýbektisiniń tańdaýy boiynsha 30-dan 90 kúnge deiin boldy. Qaryz alýshynyń ótinishinde tólemderdi keiinge qaldyrýdyń ózge merzimi kórsetilýi múmkin. Keiinge qaldyrý kezeńinde qaryz alýshyǵa qatysty talap-aryz jumysy, merzimi ótken bereshekti óteý qajettigi týraly habarlama, sondai-aq kreditordyń komissiialyq jáne ózge de tólemderdi alýy toqtatyldy», - dedi Premer-Ministrdiń birinshi orynbasary.
Aitýynsha, 2021 jyly ekinshi deńgeili bankterge 603 qaryz alýshy ShOB sýbektileriniń qaryzy boiynsha tólemderdi keiinge qaldyrý týraly ótinish bergen.
«Onyń ishinde 553 ShOB sýbektisi 9,7 mlrd teńge somanyń nesie tólemin keiinge qaldyrýǵa múmkindik aldy. Mikroqarjy uiymdaryna 131 ShOB sýbektisinen ótinish túsip, 95 nysannyń 105,8 mln teńge kólemindegi nesie tóleminiń ýaqyty shegerildi» - dep jazdy Álihan Smaiylov.
