Biyl Nur-Sultan, Almaty, Shymkent qalalarynda jumysshy jastarǵa 3 myńǵa jýyq páter beriledi. Bul jaiynda Májilis depýtattarynyń saýalyna QR Premer-Ministriniń orynbasary Eraly Toǵjanovtyń jaýabynda aitylǵan, dep habarlaidy QazAqparat tilshisi.
«Úkimettiń 2019 jylǵy 30 qańtardaǵy № 27 qaýlysymen bekitilgen Jastar jylyn ótkizý jónindegi jol kartasy aiasynda jyl saiyn Nur-Sultan, Almaty, Shymkent qalalarynda jumysshy jastar (jas mamandar) úshin keminde úsh myń jalǵa beriletin páter salý kózdelgen. Aitalyq, eki jyl ishinde osy qalalarda jumys isteitin jastarǵa 4 354 páter berildi. Biylǵy jyly taǵy 3 myńǵa jýyq páter beriletin bolady. Bul rette, Aqparat jáne qoǵamdyq damý ministriniń buiryǵymen Jumys istep júrgen jastarǵa satyp alý quqyǵynsyz jalǵa beriletin turǵynjai berý qaǵidalary (budan ári – Qaǵidalar) bekitildi. Oǵan sáikes jas azamattyń turaqty jumys orny bolýǵa jáne menshiginde jyljymaityn múlki bolmaýǵa tiis», - delingen vitse-premer jaýabynda.
Onyń atap ótýinshe, satyp alý quqyǵynsyz jalǵa beriletin turǵyn úi 5 jyl merzimge usynylady. Atalǵan jobanyń negizgi maqsaty - jastarǵa jeke turǵyn úi satyp alý úshin bastapqy jarnany jinaý boiynsha jaǵdai jasaý.
«Jalǵa beriletin turǵyn úi alǵan azamat bes jyl ishinde jeke turǵyn úi satyp alý úshin ipoteka boiynsha bastapqy jarna somasyn jinaqtaýǵa tiis. Ol úshin qaǵidalarda tabys boiynsha 40 ailyq eseptik kórsetkishten (116 680 teńge) tómen emes shekteý kózdelgen. Atalǵan shekti 25 AEK-ke (72 925 teńge) deiin tómendetken jaǵdaida, ótinish berýshiniń 5 jyl ishinde jeke turǵyn úi satyp alý úshin bastapqy jarnaǵa qajetti somany jinai almaý qaýpi týyndaýy múmkin», -dedi Eraly Toǵjanov.
