Biyl 9 aidyń ishinde el kóleminde beinebaqylaý kameralarynyń kómegimen 9913 qylmystyń beti ashyldy. Bul týraly QR Ishki ister ministriniń orynbasary Sáken Sársenov málim etti, dep habarlaidy QazAqparat.
«Qoǵamdyq qaýipsizdikti qamtamasyz etýdegi aitýly sharalardyń biri kópshilik oryndardy jappai beinebaqylaý kamerasymen qamtamasyz etý. Beinebaqylaý kamerasyna túsken kez kelgen quqyqbuzýshylyq faktisi sotta nemese tergeý kezinde dálel retinde qoldanylady. Beinebaqylaý júiesi qylmystyń izin sýytpai ashýǵa, aiǵaqtardy jinaýǵa ǵana emes, onyń aldyn alýǵa da kómektesedi. Qazirgi tańda respýblika aýmaǵynda 625 myńnan astam beinebaqylaý kamerasy qoiylǵan. Onyń 100 myńǵa jýyǵy Jedel basqarý ortalyǵyna tiesili. Biyl 9 aidyń ishinde beinebaqylaý kamerasynyń kómegimen respýblika boiynsha 9 913 qylmys ashyldy», - dedi Sáken Sársenov Ortalyq kommýnikatsiialar qyzmetinde ótken baspasóz máslihatynda.
Sondai-aq, ministr orynbasary beinebaqylaý kamerasynyń kómegimen ashylǵan qylmystardyń birin aityp ótti.
«Biyl 8 qyrkúiekte, túngi saǵat 01:30 shamasynda qonaqtan kele jatqan Petropavl turǵynynyń uialy telefonyn belgisiz bireý qolynan julyp alyp, mopedke otyryp, sybailasymen birge qashyp ketken. Jábirlenýshi qylmyskerdiń túrin baiqap úlgermegen, esesine oqiǵa beinebaqylaý kamerasyna túsip qalǵan. Tártip saqshylary 18 jáne 15 jastaǵy eki jasóspirimdi dereý ustady. Urlanǵan zat tárkilendi», - dedi ol.
