Densaýlyq saqtaý ministri elimizdegi emhana, aýrýhana men ońaltý ortalyqtaryndaǵy meditsina qyzmetkerlerin MÁMS paketterin jappai jattap alýǵa keńes berdi, dep habarlaidy QazAqparat.
Óitkeni qazir meditsinalyq saqtandyrýdyń artyqshylyǵy men paidasyn nasihattaý isi aiaqtalyp keledi.
«Endi azamattarǵa jańa júie boiynsha qyzmetter qalai kórsetiletinin, kimge qandai meditsinalyq kómek qoljetimdi bolatynyn túsindirý kerek», - dedi vedomstvo basshysy Densaýlyq saqtaý ministrliginiń alqa otyrysynda.
«Qazir halyq arasynda áleýmettik saýalnama júrgizip, jurttyń reformaǵa qatysty oi-pikirin bilýimiz qajet. MÁMS júiesiniń barlyq paketi bekitilgen. Endi dáriger, medbikeler jańa paketter boiynsha jumys isteýdi úirenip, ásirese, aýyldy jerlerdegi ýchaskelik dárigerler jyl sońyna deiin MÁMS, TMKKK paketin qalai paidalanýǵa bolatynyn árbir patsientke túsindirýi tiis», - dedi vedomstvo basshysy.
Sondai-aq, elimizde MÁMS júiesine qatysý úshin azamattardyń mártebesin anyqtaý isi de jalǵasýda. Qazir beiresmi jumys istemeitin 687,7 myń adamnyń mártebesi áli belgisiz.
Densaýlyq saqtaý vitse-ministri Lázzat Aqtaeva, Nur-Sultan qalasy (66 paiyz), Qostanai (71 paiyz), Soltústik Qazaqstan oblystarynda (63 paiyz) kórsetkish tómen ekenin aitty. Al Qaraǵandy, Aqtóbe, Pavlodar turǵyndary belsendi.
«MSAK kórsetetin meditsinalyq mekemege tirkelmegen turǵyndar da bar. Aqmola, Jambyl, Almaty, Pavlodar, Soltústik Qazaqstan oblystarynda tirkelgen mekenjaida turmaidy, vedomstvolyq nemese jeke menshik klinikalarda emdeletindikten, emhanaǵa barmaityn turǵyndar kóp. Sondyqtan IIM, Ádilet ministrlikterinen azamattar týraly aqparatty jańartyp otyrýǵa kómektesýdi suraimyz»,- dedi Lázat Aqtaeva.
Lázat Aqtaeva mindetti áleýmettik meditsinalyq saqtandyrý boiynsha qandai qyzmetter kórsetiletinin taǵy naqtylap ótti.
«MÁMS paketi boiynsha saqtandyrylǵan keibir azamattarǵa stomatologiialyq qyzmet, sonymen qatar, TMKKK kirmeitin diagnostikalyq, ońaltý syndy meditsinalyq kómek kórsetiledi. Al shuǵyl meditsinalyq kómek mártebesine, saqtandyrylǵanyna qarmai kez kelgen adamǵa kórsetiledi. Al statsionar men statsionardy almastyratyn kómek sozylmaly jáne juqpaly aýrýy bar adamdarǵa jáne saqtandyrylǵandarǵa qoljetimdi», - dedi vitse-ministr.
Aita ketý kerek, 10 mln 600 myń adam jeńildik jasalǵan 15 sanatqa kiredi, olar úshin medsaqtandyrý qoryna aqshany memleket aýdarady. Jalpy, halyqtyń 90 paiyzdan astamy MÁMS júiesine qatysady dep josparlanǵan.
