QR Densaýlyq saqtaý ministri Eljan Birtanov qyrǵyz áriptesterine Qazaqstannyń densaýlyq saqtaý júiesinde júzege asyrylyp jatqan memlekettik baǵdarlamalar týraly aityp berdi, dep habarlaidy QazAqparat.
Ministr Qazaqstannyń tsifrlandyrý salasyndaǵy jetistikteri men densaýlyq saqtaý salasyndaǵy statistikalyq málimetterdiń sapasy jaqsarǵanyn atap ótti. Osylaisha, qańtar aiynan bastap memlekettik meditsinalyq uiymdar qaǵazsyz meditsinalyq qujattamaǵa kóship ketken. Qazirdiń ózinde halyqtyń 95 paiyzyna elektrondy densaýlyq pasporty jasalyp, emhanalardaǵy kezek 30 paiyzǵa qysqarǵan.
«Biylǵy túlekterdiń bólinip, óńirlerge taratylýyna bailanysty alǵashqy meditsinalyq kómek boiynsha dárigerlerdiń tapshylyǵy 900 adamǵa qysqardy. Jergilikti atqarýshy organdar tarapynan jas kadrlarǵa áleýmettik qoldaý sharalary aitarlyqtai kúsheitilgen. Biyl Respýblikalyq komissiia ár aimaqtyń qajettiligine qarai 3776 jas dárigerdi óńirlerge jiberdi, onyń ishinde 1819 maman aýylǵa attandy», - dedi Eljan Birtanov.
Ministrdiń aitýynsha, Elbasynyń «Áleýmettik qamqorlyq» sharalaryn iske asyrý aiasynda 1 maýsymnan bastap meditsina qyzmetkerleriniń jalaqysy 30 paiyzǵa kóterilgen.
Qyrǵyz áriptesteriniń aldynda Eljan Birtanov sondai-aq, 2018 jyldan bastap respýblikada dári-dármekpen qamtamasyz etýdiń ortalyqtandyrylǵandyǵyn aityp ótti. Ministrdiń aitýynsha, dári-dármekterdi satyp alýdyń ashyqtyǵy qamtamasyz etilip, tegin dári-dármekterdi taratýdyń elektrondy tirkeýi engizilgen. Biryńǵai bailanys ortalyǵy iske qosylǵan.
Qazaqstanda sonymen qatar dári-dármekterdiń baǵasy rettelip keledi. 2019 jylǵy Biryńǵai distribiýtordyń tizimin qalyptastyrý kezinde dári-dármekterdiń baǵasy 40 paiyzǵa deiin tómendedi. Sonymen birge, jalǵan dári-dármekterdi anyqtaý úshin dárilik zattardy tańbalaý boiynsha pilottyq joba iske qosylyp otyr. 2020 jyldan bastap elektrondy retseptter mindetti bola bastaidy.
Ministr qaterli isik aýrýyn baqylaýdyń 2022 jylǵa deiingi keshendi josparynyń oryndalýy týraly da aitty. Jospardy iske asyrýǵa bólingen 35 milliard teńgeden astam qarajattyń 32 milliardy aqysyz meditsinalyq kómekti, onyń ishinde molekýlalyq-genetikalyq testileýge, radiatsiialyq terapiia jáne palliativti kómekti keńeitýge baǵyttalǵan. Nur Sultan qalasynda radiatsiialyq jáne protondy terapiiaǵa arnalǵan, zamanaýi qondyrǵylarmen jabdyqtalatyn Ulttyq ǵylymi onkologiialyq ortalyq salynýda.
Sóz sońynda Eljan Birtanov ministrlik ázirlegen jańa Densaýlyq kodeksiniń jobasy týraly aita kele onyń qazir Parlamentte qaralyp jatqanyn tilge tiek etti.
«Jańa kodekste azamattardyń qoǵamdyq densaýlyqty qamtamasyz etýdegi birlesken jaýapkershiligin anyqtaýǵa, meditsina qyzmetkerleriniń mártebesin nyǵaitýǵa, elektrondy densaýlyq saqtaýdyń zamanaýi aspektilerin anyqtaýǵa baǵyttalǵan birqatar negizgi bólimder qarastyrylǵan», - dedi ministr.
Densaýlyq saqtaýdy damytýdyń 2025 jylǵa deiingi memlekettik baǵdarlamasynyń jobasy densaýlyq saqtaý júiesin jetildirýge baǵyttalǵan. Onyń ereksheligi - halyqaralyq densaýlyq saqtaý baǵdarlamalary arqyly balalar men jastardyń densaýlyǵyna nazar aýdarý. Eljan Birtanovtyń aitýynsha, memlekettik baǵdarlamanyń maqsatty indikatorlary qazaqstandyqtardyń ómir súrý uzaqtyǵyn 75 jasqa deiin arttyrýǵa baǵyttalǵan.
