Tanymal qazaqstandyq ánshi Dimash Qudaibergen otandastaryn Táýelsizdiktiń 30 jyldyq mereitoiymen quttyqtady, dep habarlaidy Sputnik.
"Qurmetti otandastar! Ata-babamyz ǵasyrlar boiy ańsaǵan táýelsiz el bolǵanymyzǵa biyl 30 jyl tolyp otyr. Rýhy biik, namysy berik ultymyzdyń ǵasyrlar boiǵy asyl muraty — azattyqty aialaý, halqymyzdyń tatýlyǵyn saqtaý – bizdiń basty muratymyz. Bostandyq pen erkindiktiń bastaýy bolyp tabylatyn osy saltanatty kúni barshańyzǵa igilik pen baqyt, baq-dáýlet, yrys, nesibe tileimin", - dedi jas ánshi beineúndeýinde.
Ol qazaqstandyqtarǵa el damýy men kemeldenýi jolyndaǵy eńbegine tabys, barlyq bastamasyna sáttilik tiledi.
"Birligimiz bekem, tirligimiz tiianaqty bolsyn, aǵaiyn! Táýelsizdigimizdiń tuǵyry biik bolǵai! Ulttyq, memlekettik rýhymyz asqaq bolǵai!", - dedi Qudaibergen.
Dimash Qudaibergen – qazaqstandyq ánshi, kompozitor jáne mýltiinstrýmentalist. Qazaqstannyń eńbek sińirgen qairatkeri.
Dimash Qytaida Singer televiziialyq shoýyna qatysyp, búkil álemge tanyldy. Shoý Hýnan TV telearnasynan 2017 jyly transliatsiialanǵan edi. Pandemiiadan keiin ánshi "álemdik shoý biznestegi jumysyn jalǵastyrý úshin" Qytai sahnasyna qaita oraldy. Dimashtyń aitýynsha, oǵan Qytaida, basqa da elderde kinoǵa túsý týraly usynystar kóp túsedi.
